Թրքական ընտրութիւնները եւ Արեւմտեան Հայաստանի Հայութիւնը

ԱՐԵՒՄՏԵԱՆ ՀԱՅԱՍՏԱՆ — 24 Յունիս 2016-ին Արեւմտեան Հայաստանի Հանրապետութիւնը պաշտօնապէս վաւերացուց Սեւրի խաղախութեան դաշնագիրը: Իսկ թիւրքիոյ նախագահ՝ պարոն Էրդողանը ուրիշ թուական չ՛գտաւ բացի 24 Յունիս 2018-էն՝ որպէս նախագահական եւ խորհրդարանական արտահերթ ընտրութիւններու օր:

Հետաքրքրական է այս զուգադիպութիւնը: Շատեր Հայկական քաղաքական դաշտին վրայ պիտի նոյնիսկ չանդրադարնա՛ն այս երեւոյթին, որովհետեւ անոնք պարզապէս ուրիշ մոլորակի վրայ կ՛ապրին՝ որտեղ Արեւմտեան Հայաստան ալեւս գոյութիւն չունի, կամ այդպէս կ՛ենթադրեն:
Պարոն Էրդողանը, շատ մը Հայ քաղաքագէտներէ եւ քաղաքական գործիչներէ աւելի ողջ եւ իրապաշտ գիտակցութիւն կը ցուցաբերէ Արեւմտեան Հայաստանի Հանրապետութեան վերականգման ներկայ հնարաւորութիւններուն նկատմամբ: Ան քաջատեղեակ է որ Արեւմտեան Հայաստանի Հանրապետութեան կողմէ Սեւրի խաղախութեան դաշնագիրի վաւերացումը ուժի մէջ դրաւ հարիւր տարի շարունակ կախեալ մնացած դաշնագիրը:
Այսօր ան համոզուած է, որ ընտրութիւններու իր յաղթանակով միայն պիտի երաշխաւորուի Թիւրքիոյ հողային ամբողջականութիւնը, այդ պատճառով ալ ինքն իր յաղթանակը կը վստահի իր երիտթիւրքական/հակահայ “զարգացում եւ բարգաւաճութիւն” կուսակցութեան հետեւորդներուն եւ այլ ազգայնամոլ քեմալական քաղափարախօսութիւն կրող հոսանքներու հետեւորդներու ձայներուն:

Միւս կողմէ, “Ժողովուրդներու ժողովրդավարական” կուսակցութիւնը (Կարօ Փայլանի կուսակցութիւնը), որ հանդէս կուգայ պարոն Էրդողանի ընդիմադիր կուսակցութիւններու շարքին՝ իր ընտրական պայքարի քաղափարախօսութիւնը կը հիմնաւորէ այն համոզմունքին վրայ, որ Թիւրքիան իր հողային ամբողջականութիւնը պիտի կորսնցնէ Էրդողանի յաջողութեան պարագային: Այսինքն իրենք եւս դէմ են Արեւմտեան Հայաստանի վերականգման հարցին, ու որպէս այլընտրանք՝ կ՛առաջարկեն “ժողովրդավարական” մէկ եւ անբաժան Թիւրքիայ:

Փաստօրէն, թրքական ներկայ նախագահական եւ խորհրդարանական ընտրութիւններու պայքարի խորքին՝ ակնյայտորէն ներկայ է Արեւմտեան Հայաստանի վերականգնման “վտանգի” հարցը:

Երկու հոսանքներն ալ՝ թէ իսլամական ու ազգայնական ծայրայեղական ջիհատիստական տեռորը հովանաւորող եւ երաշխաւորող եւ թէ՛ ժողովրդավարութիւն քարոզող կողմը՝ կը մրցակցին աւելի “ճիշտ” ձեւով ապահովելու Թիւրքիոյ հողային ամբողջականութիւնը: Սա է ներկայ Թիւրքիոյ ներքաղաքական հիմնախնդիրը, մնացած վանկարկումները երկրորդական են, եւ հասարակութեան ձայնը սիրաշահելու միջոց:
Նման իրավիճակի լոյսին տակ ինչպէ՞ս պէտք է Արեւմտեան Հայաստանի Հայութիւնը դիրքորոշուի՝ թէ՛ տարագիր սփիւռքի համայնքներեն ներս եւ թէ մա՛նաւանդ գրաւեալ Արեւմտեան Հայաստանի տարածքներուն մէջ ապրողները:

Արեւմտեան Հայաստանի տարագիր սփիւռքի համայնքներու Հայութիւնը պէտք է իր ուշադրութիւնը սեւեռէ ճիշտ ուղութեան վրայ: Փոխանակ զբաղուելու Թիւրքիոյ տարբեր քաղաքական ուժերու յայտարարութիւններով եւ ծրագիրերով, նոյնիսկ երբ անոնք կը ներկայացուին հայանուն անցանց միջոցով՝ ուշի ուշով պէտք է հետեւին գրաւեալ Արեւմտեան Հայաստանի տարածքներուն մէջ ապրող պարզ հասարակ Հայութեան դիրքորոշքւմներուն, նեցուկ կանգնին անոնց: Ի հարկէ նկատի ունինք գրաւեալ Արեւմտեան Հայաստանի քաղաքներուն եւ գիւղերուն մէջ ապրող, հարիւր տարի շարունակ Հայկական հողին տէր կանգնող եւ Հայկական ինքնութիւնը պահպանող Հայութիւնը՝ եւ ո՛չ թէ թրքական կուսակցութիւններուն եւ պետական այլ կառոյցներուն մէջ ներգրաւուած կարգ մը հայերը:

Իսկ գրաւեալ Արեւմտեան Հայաստանի տարածքներուն մէջ ապրող Հայութիւնը որպէս գրաւեալ երկրի եւ Պետութեան ժողովուրդ՝ ըստ միջազգային օրէնքի եւ յատկապէս Ժնեւի չորս Համաձայնագիրներու գրաւեալ երկիրներու ժողովուրդներուն ընծայած իրաւունքներուն, անոնք պարտաւոր չե՛ն մասնակցելու բռնագրաւող իշխանութիւններուն կողմէ կազմակերպուած որեւէ ընտրութեան կամ այլ ձերնարկումներուն, որոնք չե՛ն համապատասխաներ իրենց ինքնիշխանութեան իրաւունքներուն:

Գրաւեալ Արեւմտեան Հայաստանի տարածքներուն մէջ ապրող Հայութեան հիմնախնդիրն այսօր կը հանդիսանայ իրենց ինքնութեան հարցը, եւ այդ ինքնութենէն բխող ինքնիշխանութեան իրաւունքի հարցերը, որոնք կ՛իրականանան միայն անկախութեամբ եւ Հայրենիքի տարածքներու ազատագրումով, անկախ անկէ թէ ով կ՛ըլլայ բռնագրաւող կողմի իշխանութեան գլխուն:

Արեւմտեան Հայաստանի Հանրապետութեան Կառավարութիւնը՝ համաձայնութեամբ գրաւեալ Արեւմտեան Հայաստանի տարածքներուն վրայ ապրող Հայութեան հետ, ամէն միջոցներով կը պաշտպանէ անոնց ինքնութեան հետ կապ ունեցող բոլոր իրաւունքները եւ համատեղ հասկցողութեամբ կը ծրագրէ իր ապագայ քայլերը:

Input your search keywords and press Enter.