Այսօր, Հոկտեմբերի 1-ին հիւանդանոցի մէջ 94 տարեկանին հոգին աւանդեր է հայազգի աշխարհահռչակ շանսոնյէ Հայաստանի Ազգային Հերոս Շառլ Ազնաւուրը

94 տարեկանին կեանքէն հեռացեր է աշխարհահռչակ ֆրանսահայ շանսոնյէ Շառլ Ազնաւուրը:

Ասոր մասին կը տեղեկացնեն երգիչի ներկայացուցիչները:

Շառլ Ազնաւուրը (Charles Aznavour, իսկական անունը՝ Շահնուր Վաղինակ Ազնաւուրեան) ծնուեր է 1924 թուականի Մայիս 22-ին Փարիզի հայ գաղթականներ Միշա եւ Քնար Ազնաւուրեաններու ընտանիքին մէջ։

Երկրորդ աշխարհամարտին հայրը կամաւոր մեկներ է ռազմաճակատ։ Ընտանիքը պահելու համար՝ Շառլը ելոյթ ունեցած է  Փարիզեան ոչ մեծ սրճարանէն ներս եւ բռնագրաւուած Փարիզի թատրոններու բեմերուն։

Երգեր գրել սկսած է 1940-ականններու սկզբը։ 1941 թուականին Ազնաւուրը ծանօթացեր է երիտասարդ երաժիշտ Պիեր Ռոշին, որուն հետ դուետով հանդէս եկած է վարիյէտեներու եւ գիշերային ակումբներու մէջ։ 1946 թուականին համագործակցած է ֆրանսացի յայտնի երգչուհի Էդիթ Պիաֆի հետ, հիւրախաղերով հանդէս եկած է Կանադայի ու Ֆրանսայի մէջ։

1960-ին Ֆրանսուա Տրիւֆոյի «Կրակեցէք դաշնակահարին վրայ» ֆիլմի էկրանավորումէն յետոյ, ուր Ազնաւուրը կաբարէյի դաշնակահարի դեր խաղցաւ, երգիչը նաեւ տաղանդաւոր դերասան ճանաչցուեցաւ:

Շառլ Ազնաւուրը հեղինակած է մօտաւորապէս հազար երգ, խաղցած է 60 ֆիլմի մէջ եւ վաճառած է աւելի քան 100 միլիոն ձայնասկաւառակ: Time ամսագիրի կողմէ կայացած հարցման համաձայն՝ Ազնաւուրը ճանչցուած է 20-րդ դարու լաւագոյն կատարող:

1988 թուականին Սպիտակի երկրաշարժէն ետք՝ Ազնաւուրը հիմնած է Aznavour pour l’Armеnie («Ազնաւուրը Հայաստանի համար») բարեգործական միութիւնը, եւ քանի մը ելոյթներ կազմակերպած է երկրաշարժէն տուժածներուն օգնելու համար։ Անոնցմէ մէկուն համար ան հրաւիրած է Անրի Վեռնոյն ու 90 ֆրանսացի երգիչներ ու դերասաններ, որոնց հետ միասին ձայնագրած է «Քեզի համար, Հայաստան» երգը, որ վաճառուեցաւ 2 միլիոն օրինակով, եւ որու հիման վրայ նկարահանուեցաւ նաեւ տեսահոլովակ։

 

Ազնաւուրի արուեստը արժանացած է Վենետիկի միջազգային կինոփառատօնի «Ոսկե առիւծ» (1971), պատուաւոր «Սեզար» (1997), Կաննի միջազգային կինոփառատօնի պատուաւոր մրցանակներուն (2006):

Անոր շնորհուած է Հայաստանի ազգային հերոսի կոչում՝ (2004) Հայրենիքի շքանշանի պարգեւատրմամբ:

Ան Կանադայի ասպետ է (2008):

2001 թուականին Երեւանի մէջ բացուեցաւ Շառլ Ազնաւուրի անուան հրապարակ:

2008 թուականի Դեկտեմբերի 26-ին Ազնաւուրն ստացաւ ՀՀ քաղաքացիութիւն։

2009-ին Երեւանի մէջ բացուեցաւ շանսոնի էյի տուն-թանգարանը:

2009 թուականի Մայիս 6-ին Հայաստանի նախագահ Սերժ Սարգսեանը Շառլ Ազնաւուրին Հայաստանի դեսպան նշանակեց Զուիցերոյ մէջ, Ժնեւի մէջ ՄԱԿ-ի բաժանմունքի հանրապետութեան մշտական ներկայացուցիչ:

2010 թուականին Պամիրի մէջ 5250 մետր բարձրութեամբ գագաթը կոչուեցաւ Շառլ Ազնաւուրի գագաթ:

Շառլ Ազնաւուրը քանի մը անգամ ամուսնացած է: Առաջին ամուսնութենէն ան ունի դուստր՝ Սեդա (ծնուած 1947թ.): 1967-ին Ազնաւուրը ամուսնացաւ Շուեդացի Ուլլէ Տիւրսելի հետ: Անոնք ունին երեք երեխայ` դուստր Կատիա (ծնուած 1969 թ.), որդիներ Միշա (ծնուած 1972 թ) եւ Նիկոլիա (ծնուած 1977 թ.):

Input your search keywords and press Enter.