Ազգային Ժողովի ընդունած օրէնքէն ետք՝ քաղաքական ճգնաժամ ՀՀ-ի մէջ

Երեկ երեկոյեան ՀՀ-ի Ազգային Ժողովի ՀՀԿ, ԲՀԿ, ՀՅԴ խմբակցութիւններէն քանի մը տասնեակ պատգամաւորներ՝ հապճեպ ընդունեցին փոփոխութիւններ մտցնել Ազգային Ժողովի կանոնակարգ օրէնքին մէջ: Այս օրէնքի փոփոխութիւնը շատերու մօտ ընկալուեցաւ որպէս ԱԺ-ն չցրելու եւ արտահերթ ընտրութիւններ չկայացնելու քայլ: Երեկոյեան ՀՀ-ի վարչապետ Նիկոլ Փաշինեանը դիմեց ժողովուրդին՝ կոչ ընելով գալ Ազգային ժողովի մօտ հանրահաւաքի, եւ չանցած 1 ժամ՝ Բաղրամեան-Դեմիրճեան փողոցներու խաչմերուկին հաւաքուեցան  տասնեակ հազարաւոր քաղաքացիներ։ Նիկոլ փաշինեանը անոնց դիմեց, եւ քաղաքացիները անոր գլխաւորութեամբ մուտք գործեցին ԱԺ-ի տարածք: Նիկոլ Փաշինեանը մտաւ ԱԺ՝ բանակցելու համար խորհրդարանական ուժերուն հետ, եւ 1 ժամ բանակցելէ ետք՝ դուրս գալով դիմեց քաղաքացիներուն, ըսելով, որ բանակցութիւնները չե՛ն աւարտուած, երկուստէք պայմանաւորուածութիւն չկայ, բայց ան համոզուած է, որ ընտրութիւնները պէտք է կատարուին մինչեւ տարեվերջ, եւ ատոր հասնելու համար՝ ան պատրաստ է հրաժարական տալու: Այդկէ ետք ներկաները քանի մը րոպէ ծափողջիւններով յարգեցին Շառլ Ազնաւուրի յիշատակը եւ Երեւանի փողոցներով քայլերթ իրականացուցին: Քիչ առաջ լուրեր տարածուեցան, որ Նիկոլ Փաշինեանը Հոկտեմբերի 3-ին պիտի շարունակէ բանակցութիւնները՝ կապուած ԱԺ-ի լուծարման և արտահերթ ընտրութիւններուն հետ:

Input your search keywords and press Enter.