Մոսկուա. — Անկարայի հետ Իդլիբի համաձայնագիրները ժամանակաւոր են

Յուսով եմ, որ Իդլիբի մէջ ապառազմականացման գօտիներ ստեղծելուն վերաբերող Անկարայի հետ համաձայնագիրի բոլոր պայմանները կեանքի կը կոչուին, — շեշտեց Ռուսաստանի փոխարտգործնախարարը, նաեւ, որ համաձայնագիրը ժամանակաւոր է եւ նպատակ ունի երաշխաւորելու Սուրիոյ ինքնիշխանութիւնն ու տարածքային ամբողջականութիւնը, ինչպէս նաեւ կործանելու Սուրիոյ տարածքին գտնուող ահաբեկչական խարիսխները, յատկապէս Իդլիբի մէջ:

“Հիւսիսային Սուրիոյ Իդլիբի շրջանին ապառազմականացման գօտիի ստեղծումն ու այդ ուղղութեամբ տարուող ջանքերը առիթ հանդիսացած են կանխելու բազմաթիւ հնարաւոր զոհեր”, տեղեկացուցած է Ռուսիոյ Արտաքին Գործոց փոխնախարար Միխայիլ Բոգդանովը Sputnik-ին։

“Իդլիբի մէջ ապառազմականացուած գօտի ստեղծելու ուղութեամբ ձեռնարկուած միջոցները մեծ յաջողութիւններ ունեցած են՝ առաջքը առնելով սուրիացի բազմաթիւ զոհերու, ինչպէս քաղաքացիական, այնպէս ալ զինուած ուժերու, նոյնիսկ զինուած խումբերու անդամներու շարքերուն մէջ, — ըսած է Բոգդանովը Յունական Ռոդոս կղզիին մէջ տեղի ունեցած «Քաղաքակրթութիւններու երկխօսութիւն» անուանուած համաժողովին ընթացքին:

Փոխնախարարը աւելցուցած է, որ ռուսական կողմը ցանկութիւն յայտնած է, հնարաւորինս շուտ սկսելու Իդլիբի խաղաղութեան գործընթացը, սակայն այդ պէտք է կատարուի մեծ զգուշութեամբ:

“Ի հարկէ, մենք կը ցանկանայինք իրականացնել այն ամէնը ինչ ես աւելի շուտ յիշատակեցի, բայց սա պէտք է կատարուի շատ զգոյշ եւ ուշադիր, պահպանելով մեր գործընկերներուն հետ Աստանայի գործընթացի փոխըմբռնումը: Եւ առաջին հերթին՝ խուսափելով քաղաքացիներու շրջանին կորուստներէ”, աւելցուցած է ան։

Մոսկուան հաւատարիմ է Սուրիոյ տարածքային ամբողջականութեանն ու ինքնիշխանութեան: Անկարայի հետ պայմանաւորուածութիւնը ժամանակաւոր է, եւ ուղղուած է Սուրիոյ մէջ ահաբեկչութեան վերացման, ըսած է Միխայիլ Բոգդանովը:

Անկարայի կողմէ աջակութիւն ստացող ահաբեկիչներու առաջին խումբը սկսած է Իդլիբի ապազինուած գօտիէն դուրս գալ, որուն ուրուագիծերը դրուած են Մոսկուայի եւ Անկարայի միջեւ Սոչիի մէջ ձեռք բերուած պայմանաւորուածութեան համաձայն:

Input your search keywords and press Enter.