«Build Armenia» (Կառուցէ Հայաստան) հիմնադրամը կը պատրաստուի 100 միլիոն դոլար ներդնելու հայրենադարձութեան ծրագիրին

Զուիցերահայ գործարար, «Ֆրենք Միւլլըր» աշխարհահռչակ ապրանքանիշի հիմնադիր, Մարսէյլի մօտ Հայաստանի գլխաւոր հիւպատոս Վարդան Սրմաքէշ նախաձեռնած է նոր ծրագիրի մը՝ «Build Armenia» (Կառուցէ Հայաստան) հիմնադրամը, որուն միացած են շուրջ տասնեակ մը հայազգի  գործարարներ:

Սկզբնական շրջանին, նախագիծին համար պիտի ներդրուի շուրջ 100 միլիոն դոլար, որ պիտի օժանդակէ հայերու վերադարձին հայրենիք:

Վերադարձողներուն համար պէտք է ստեղծուին պայմաններ. անոնք պէտք է կարենան օգտուիլ առողջապահական, կրթական եւ արհեստակցական կեդրոններէ, մասնաւորապէս կաշիի, ոսկերչական իրերու արտադրութեան ոլորտին մէջ եւ պէտք է ստեղծուի արտադրական շղթայ:

Ըստ Վարդան Սրմաքէշի՝ հիմնադրամի գործունէութիւնը պէտք է զարգանայ Եւրոպական չափանիշներուն համապատասխան:

«Մենք բաց եւ թափանցիկ պիտի ըլլանք, որպէսզի բոլորը կարենան հետեւիլ մեր աշխատանքին եւ մեր նպատակային ծախսերուն», ըսած է գործարարը՝ աւելցնելով, որ հիմնադրամին կրնան միանալ նոր հայրենադարձներ, յատկապէս Ռուսիայէն:«Ես վստահ եմ, որ եթէ մենք շարժինք ճիշդ ուղղութեամբ՝ պիտի կարենանք բարձրացնել Հայաստանի վարկանիշը միջազգային մակարդակով, եւ ապահովել հայրենադարձներու լայնածաւալ ներհոսք, ըսած է Վարդան Սրմաքէշ:

Input your search keywords and press Enter.