Պաշտօնական Հաղորդագրութիւն

Առաջին Համաշխարհային Պատերազմի աւարտի 100 ամեակին նուիրուած միջոցարումը մնաց անկատար եւ բովանդակազուրկ՝ Արեւմտեան Հայաստանի Հանրապետութեան ակնյայտ բացակայութեամբ:

Ողջ աշխարի տարածքով տարագրուած Արեւմտեան Հայաստանի Հայութիւնը, եւ  գրաւեալ Արեւմտեան Հայաստանի ու Կիլիկիոյ տարածքներէն ներս ապրող Հայութիւնը՝ յատուկ ուշադրութեամբ հետեւեցան այդ միջոցառումին: Անոնք ուշի ուշով քննեցին աշխարհի տարբեր երկիրները ներկայացնող ղեկավարներու աչքերու արտայայտութիւնները: Ի՞նչքան կեղծիք եւ խաբկանք կրնան թագնեցնել այն աչքերը, եւ մինչեւ երբ:  

19 Յունուար 1920-ի Փարիզի խաղաղութեան վեհաժողովին՝ ջախջախուած Օսմանեան կայսրութեան կողմէ գրաւեալ Հայկական տարածքներուն վրայ Հայաստան Պետութիւնը ճանչցող բոլոր պետութիւններուն ներկայացուցիչները ներկայ էին այսօր Փարիզի միջոցառումին: Արեւմտեան Հայաստանի տարածքներուն վրայ անոնց ճանաչումը ստացած պետութեան սահմանագծումին վերաբերեալ Իրաւարար վճիռ կատարող եւ այդ վճիռի մասին դիմումներ ներկայացնող պետութիւններու ներկայացուցիչներն ալ այնտեղ էին: Բոլորը մէծ ուշադրութեամբ մտիկ ըրին Պարոն Էմանուէլ Մակրոնի կատարած սրտաճմլիկ երկար ելույթը: Նման ելոյթի համոզուածութեամբ արտասանութիւնն ու զայն համոզումով ունկնդրելը՝ բարձր եւ յատուկ կարողութիւններ կ’ենթադրեն երկու կողմերէն հաւասարապէս:  

Այնտեղ քանի մը հարիւր մետր անդին՝ ոչ պաշտօնապէս, բայց անձնապէս ներկայ էր նաեւ Արեւմտեան Հայաստանի շարունակուող Հանրապետութեան Նախագահ՝ Պարոն Արմենակ Աբրահամեանը, իր հետ վերցուցած աշխարհի միլիոնաւոր Արեւմտեան Հայաստանի Հայութեան դժգոհութիւնն ու զայրոյթը: Անոնց ճնշիչ ներկայութիւնը աւելի էական եւ իրական էր՝ քան անոնց պարտադրուած եւ անարդար բացակայութիւնը:

Պարոն Մակրոնն իր պաշտօնական ելոյթն աւարտեց՝ աշխարհի բոլոր ժողովուրդներուն եւ ազգերուն մաղթելով խաղաղութիւն: Ըստ երեւոյթին՝ ան գրաւեալ Արեւմտեան Հայաստանն ու անոր տարագիր ու գրաւման տակ գտնուող ժողովուրդը ներառած չէր իր պատկերացուցած աշխարհին մէջ: Այս ժխտողականութիւնը յատկապէս եւ բացայայտ դիտաւորեալ համարուեցաւ Արեւմտեան Հայաստանի Հայութեան կողմէ, մանաւանդ որ Արեւմտեան Հայաստանի Հանրապետութեան նախագահ Պարոն Արմենակ Աբրահամեանը նախօրոք այդ Միջոցառումին իր ներկայ գտնուելու պատրաստակամութիւնը յայտնող նամակներն ուղարկած էր թէ’ Ֆրանսայի Հանրպետութեան Նախագահ Պարոն Էմանուէլ Մակրոնին, եւ թէ’ Ֆրաանսական խորհրդարանի երկու պալատներու պատգամաւորներուն, նաեւ Փարիզի քաղաքապետին ու բոլոր թաղապետարաններուն: Ողջ Ֆրանսայի Հանրապետութիւնը տեղեակ էր՝ եւ ոչ ոք կրնայ անտեղեակ ըլլալու պատրուակով արդարանալ:

Այսպիսով 11 Նոյեմբեր 2018-ն՝ Արեւմտեան Հայաստանի Հայութեան համար դարձաւ այն թուականը, որմէ անդին ան առաւել վճռակամութեամբ՝ համապատասխան վերատեսութիւններ պիտի կատարէ գրաւեալ Հայրենիքի ազատագրման եւ ազգային իրաւունքներու իրականացման ռազմավարութեան հիմքերուն մէջ:

Արեւմտեան Հայաստանի Հանրապետութեան կառավարութիւն

Input your search keywords and press Enter.