Թիւրքիան կը վերացնէ Հս. Կիպրոսի հայկական եւ յունական ժառանգութիւնը

Թիւրքիան աւելի քան չորս տասնամեակէ ի վեր կը կործանէ Կիպրոսի գրաւեալ տարածքներու մշակութային ժառանգութիւնը՝ շարունակելով մնալ ՆԱՏՕ-ի անդամ եւ հաւակնելով դառնալու Եւրամիութեան անդամ: Ասոր մասին կը գրէ թիւրք լրագրող Ուզայ Բուլութը:

Անոր խօսքով` Սուրբ Մարկոսի եկեղեցիի 6-րդ դարի խճանկարը, որ գողացուեր էր 1974-ին Թիւրքիոյ կողմէ Կիպրոս ներխուժելէն յետոյ, վերջերս յայտնաբերուեր է Մոնակոյի բնակարաններէն մէկուն մէջ եւ վերադարձուեր է Կիպրոսի իշխանութիւններուն: Այս արուեստի գլուխգործոցը, ըստ մասնագէտներու, վաղ Բիւզանդական արուեստի վերջին ամենագեղեցիկ գործերէն է; Կիպրոսի բազմաթիւ այլ մշակութային կոթողներ գողցուեր են թիւրքերու կողմէ եւ վաճառուեր են արտասահմանի մէջ:

2012-ին հրապարակուած «Քաղաքակրթութեան անկումը. գրաւուած Կիպրոսի մշակութային ժառանգութեան ոչնչացումը» զեկոյցով կ՛ըսուի. «Թիւրքիան Կիպրոսի դէմ միջազգային երկու խոշոր յանցանք գործած է: Ներխուժած եւ պառակտած է անկախ Եւրոպական պետութիւնը (2004-էն ի վեր Կիպրոսի Հանրապետութիւնը ԵՄ-ի անդամ է) եւ փոխած է կղզիի ժողովրդագրական կազմը` պարբերաբար ոչնչացնելով իր ռազմական տիրապետութեան տակ գտնուող տարածքներու մշակութային ժառանգութիւնը…Սա ակնյայտ ապացոյց է, որ Անկարան կը փորձէ թրքացնել գրաւեալ տարածքները եւ հիմնական ներկայութիւն հաստատել այնտեղ»:

Զեկոյցով գրուած է, որ 1974-էն ի վեր Թիւրքիան շարունակ կ՛ոչնչացնէ գրաւեալ տարածքներու եղած ողջ յունական կամ քրիստոնէական ժառանգութիւնը: 2015-ին ԱՄՆ-ի Կոնգրեսի գրադարանին մէջ հրապարակուած զեկոյցով հաստատուեցան վերոնշեալ զեկոյզի տեղեկութիւնները:

«Որոշ հաշուարկներով` Կիպրոսի աւելի քան 60.000 մշակութային կոթող գողցուած է»,- կը նշուի 2015-ի զեկոյցով:

Իսկ 2016-ին Կիպրոսի Հանրապետութեան արտգործնախարարութեան զեկոյցին համաձայն՝ աւելի քան 550 յունական ուղղափառ եկեղեցիներ եւ տաճարներ, որոնք կը գտնուին գրաւեալ տարածքներուն, թալանուած եւ երբեմն ալ ոնչացուած են: Բազմաթիւ քրիստոնէական աղօթարաններ վերածուած են մզկիթներու, թրքական զօրքերու կայանատեղիներու կամ ամբարներու:

Input your search keywords and press Enter.