Արեւելեան Լեգէոնի Կիլիկիա Մուտքի Հարիւրամեայ Յոբելիանին Առիթով

28 Նոյեմբեր 1918 – 28 Նոյեմբեր 2018

Մամլոյ Հաղորդագրութիւն

Կիլիկիայի Ազգային Խորհուրդի հիմնադիր մարմինը ժողով գումարեց իր բոլոր անդամներով՝ հայեր, սուրիացիներ, արեւելքցիներ, հայկական Սփիւռքէն, Սուրիայէն, Լիբանանէն եւ գրաւեալ Կիլիկիայէն, ու Պէյրութի մէջ 24 Նոյեմբեր 2018-ին գումարած իր ժողովի աւարտին, որոշեց միջազգային ընտանիքին ուղղել նամակ մը, մասնաւորաբար Ֆրանսային եւ Բրիտանիոյ, այն երկու կողմերուն, որոնք հիմնական պատասխանատուներն են Մուսթաֆա Քեմալ Աթաթուրքի վոհմակներու Կիլիկիա մուտքին եւ վերստին գրաւումին, Կիլիկիայի բնիկ ժողովուրդներուն՝ հայերու, սուրիացիներու, սիրիանիներու եւ այլոց նկատմամբ ցեղասպանութիւն գործադրելով: Երկիրը ազատագրուած էր Արեւելեան Լեգէոնի ճիգերով: Այս Լեգէոնին մաս կը կազմէին հայ եւ սուրիացի երիտասարդներ եւ 19 Սեպտեմբեր 1918-ին Պաղեստինի մէջ Արարայի հերոսական ճակատամարտին մասնակցելէ ետք  Կիլիկիա մտած էին 28 Նոյեմբեր 1918-ին:

Նոյեմբեր 1916-ին, Լոնտոնի ֆրանսական դեսպանատան մէջ, հայ Ազգային պատուիրակութեան նախագահ Պօղոս Նուպարեան եւ ֆրանսացի Ժորժ Փիքօ ու անգլիացի Մարք Սայքս ժողով գումարած էին ու Արեւելեան Լեգէոնի կազմութեան շուրջ համաձայնած էին: Այդ Լէգէոնը պիտի բաղկանար Մուսալեռէն փրկուած հայ երիտասարդներէ եւ անոր հիմնական նպատակը պիտի ըլլար Կիլիկիայի ազատագրումը օսմանեան լուծէն:  Ժորժ Փիքօ ֆրանսական պետութեան անունով տուաւ հետեւեալ խոստումը.«Ֆրանսա կը խոստանայ Դաշնակիցներու յաղթանակէն ետք Կիլիկիային շնորհել ինքնավարութիւն, եւ զայն դնել ֆրանսական հոգատարութեան տակ:»

20 Հոկտեմբեր 1921-ին, Ֆրանսան Աթաթուրքի հետ ստորագրեց ապօրինի «Անգարայի Համաձայնագիր»ը:  Այն Աթաթուրքին, որ բրիտանական գաղտնի գործակալութեան կողմէ զինուրագրուած էր եւ զինեալ վոհմակներու ղեկավար էր:  Ֆրանսա Աթաթուրքին զիջեցաւ Կիլիկիայի մէջ իր չունեցած իրաւունքները, քայլով մը, որ կ’ոտնակոխէր բոլոր միջազգային օրէնքներն ու համաձայնագիրները, եւ անոր իրաւունք տուաւ շարունակելու բնիկ ժողովուրդներու ջարդը եւ անոնց հողերու գրաւումը:

Այս թուրք բռնագրաւիչը այսօր կը շարունակէ իր զինեալ ահաբեկչական վոհմակներուն միջոցով Իտլիպի եւ Հիւսիսային Սուրիոյ մէջ սպառնալ ապահովութեան ու կայունութեան եւ կը շարունակէ ջարդեր կազմակերպել այդ նոյն բնիկ ժողովուրդներուն նկատմամբ, եւ Կիլիկիայի հողամասը կ’օգտագործէ որպէս այդ զինեալներու ապահով ապաստարան, որոնք կը շարժին, զէնք,  դրամ ու բժշկական օգնութիւն կը ստանան ամենայն ազատութեամբ: Այս բոլորը կը կատարուին Ֆրանսայի, Բրիտանիոյ եւ ուրիշներու գիտութեամբ եւ նեցուկով:

Կիլիկիայի հիմնադիր Ազգային Խորհուրդը միջազգային ընտանիքի ժողովուրդներուն կոչ կ’ուղղէ այսօր, որպէսզի իրենց խորհրդարաններուն միջոցով իրենց կառավարութիւններէն պահանջեն պատմական պատասխանատուութիւն վերցնել եւ յստակ ու անկեղծ դիրքորոշում որդեգրել, կամ  շարունակել շինծու եւ արհեստական միջազգային օրէնքի եւ համաձայնաագիրներու խախտումին վրայ հիմնուած «թրքական պետութիւն»ը պաշտպանելու ողբերգութիւնը եւ կամ վերադառնալ միչազգային օրինականութեան ու վերատեսութեան ենթարկել շրջանին մէջ Թուրքիոյ նման անօրինական երկրի մը նեցուկ կանգնելու սխալ հաշիւները: Այն երկրին, որ ահաբեկիչներու հովանաւոր է եւ որու ձեռքերը ներկուած են շրջանին մէջ ջարդերու եւ ցեղասպանութիւններու արիւնով, մէկ դարի ընթացքին, եւ որ տեղ չի կրնար գրաւել շրջանի ապագային եւ միջազգային ընտանիքին մէջ:

Կիլիկիայի ժողովուրդը պիտի վերատիրանայ անոր եւ վերստին յայտարարէ անոր անկախութիւնը ու ժողովուրդին վերադարձնէ իր քաղաքական եւ օրինական իրաւունքները: Անկախութիւնը պիտի պսակէ ամբողջ հողամասին վրայ ժողովուրդի գերիշխանութեան յայտարարութեամբ: Ու Կիլիկիան պիտի վերադառնայ իր մարդկային քաղաքակրթութեան հարստացումի իր դերին ու պիտի դառնայ շրջանին մէջ ապահովութեան, խաղաղութեան եւ կայունութեան կեդրոն մը: Կիլիկիայի ժողովուրդին որոշումը անվերադառնալի է եւ ազատագրումի բոլոր միջոցները քննարկելի եւ մատչելի են:

Առաջին Համաշխարհային պատերազմի հարիւրամեակի աւարտին, 11 Նոյեմբեր 2018-ին, ֆրանսական պետութիւնը բոլոր մասնակից երկիրներու ներկայացուցիչները հրաւիրեց հանդիսութեան մը, որ տեղի ունեցաւ Փարիզի Յաղթանակի Կամարին տակ: Հանդիսութեան ընթացքին, Ֆրանսայի նախագահը յայտնեց, որ մարդկութիւնը 20 միլիոն զոհ տուաւ այդ պատերազմին, որոնց կէսը քաղաքացիներ եւ անմեղներ, սակայն ան մոռցաւ յայտնելու, որ այդ ամնեղներուն մէկ երրորդէն աւելին հայեր, արաբներ եւ շրջանի այլ բնիկ ժողովուրդներու զաւակներ էին: Այդ ժողովուրդները հակառակ անոր որ Դաշնակիցներու կողքին էին, արժէքաւոր հայրենիքներ կորսնցուցին Արեւմտեան Հայաստանէն, Կիլիկիա, Ալէքսանտրէթ հասնելով մինչեւ Պաղեստին: Մինչ հակառակ կողմ գտնուողները տէր դարձան հայրենիքներու, որոնք իրենցը չէին եւ շահեցան քաղաքական ազդեցութիւն այդ անմեղ քաղաքացիներու հաշւոյն: Թուրքիա եւ Իսրայէլ հրաւիրուած էին այդ հանդիսութեան, մինչ անկէ կը բացակայէին Արեւելեան Լեգէոնի, Կիլիկիայի եւ Արեւմտեան Հայաստանի ներկայացուցիչները:

Միւս կողմէ Կիլիկիայի Հիմնադիր Ազգային Խորհուրդը  կոչ կ’ուղղէ շրջանի բոլոր բնիկ ժողովուրդներու զաւակներուն, յատկապէս գրաւեալ Կիլիկիայի ժողովուրդին, գրաւեալ հողերուն վրայ եւ անկէ դուրս,  ստանձնելու պատմական պատասխանատուութիւնը պատրաստ ըլլալու արժէքաւոր հայրենիքը ազատագրելու գրաւող եւ ահաբեկիչ Թուրքիոյ ճիրաններէն, բոլոր կարելի միջոցներով, եւ թոյլ չտալու գրաւեալ հայրենիքի հողին պղծումը Իտլիպի մէջ շրջապատուած միջազգային ահաբեկչութեան վոհմակներուն կողմէ:

Կիլիկիայի հայ եւ սուրիացի հերոսներու բազուկներով եւ արեամբ ազատագրումի հարիւրամեակի յոբելիանը կ’աւելցնէ  մեր վճռականութիւնը զայն դարձեալ ազատագրելու, վստահելով Կիլիկիայի ժողովուրդի կամքին եւ իր ինքնորոշման իրաւունքին:

Այս սկիզբն է եւ շարունակութիւնը ազատագրուած Կիլիկիայի մէջ է:

Կիլիկիայի Ազգային Խորհուրդի Հիմնադիր Մարմին

Պէյրութ – Դամասկոս – Հալէպ – Անտիոք – Ատանա

28 Նոյեմբեր 2018

 

Input your search keywords and press Enter.