Ձիւնով ծածկուած Անին յայտնուեր է լրատուամիջոցներու ուշադրութեան կեդրոնին

Անիի աւերակները ձիւնի առատ տեղումներէն յետոյ ոչ միայն պահպաներ են իրենց գրաւչութիւնը, այլեւ յայտնուեր են լրատուամիջոցներու եւ զբօսաշրջիկներու ուշադրութեան կեդրոնին, — կը գրէ թրքական «Անադոլու» գործակալութիւնը՝ երբեմնի Բարգրատունեաց հայկական թագաւորութեան մայրաքաղաքն անուանելով «քաղաքակրթութիւններու օրրան»:

Լրատուամիջոցը նաեւ նշեր է Անիի հայկական անցեալին մասին՝ կարճ մէջբերում կատարելով Բագրատունեաց թագաւորական տոհմին մասին: Կարսի նահանգային վարչութեան ղեկավար Հաքան Դողանայը նշեր է, որ Անիի աւերակներ կ՛այցելեն առաւելապէս տեղացի զբօսաշրջիկներ տարբեր վայերէ, եւ ի զարմանս շատերու՝ ձմռան այցելուներուն թիւը ոչ թէ կը նուազի՝ այլ կ՛աճի: «Ձմռանն Անին առանձնայատուկ գեղեցիկ է: Կարծես հարսի զգեստ հագած ըլլայ: Անիի կառոյցներու քարն առանձնայատուկ կարմիր գոյն ունի, եւ երբ ձիւն կը տեղայ՝ աւերակները կը նմանուին ճերմակ զգեստը հագած հարսնացուի», – նշեր է Դողանայը: Նշենք, որ Անի քաղաքը կառուցուեր է Ախուրեան գետի աջ ափին, 961–1045 թուականներուն ան հանդիսացեր է հայ Բագրատունիներու թագաւորութեան մայրաքաղաքը: Անին յայտնի է որպէս «հազար ու մէկ եկեղեցիներու քաղաք», որոնցմէ առաւել յայտնի են կաթողիկոսանիստ Մայր տաճարը, Սուրբ Փրկիչը, Աբուղամրենց մատուռը, Առաքելոց, Տիգրան Հոնենց եկեղեցիները, Գրիգոր Լուսաւորիչի տաճարը:

Input your search keywords and press Enter.