Արցախի մէջ ձմեռային զօրակոչը մեկնարկեր է հանդիսաւոր արարողութեամբ

Արցախի Պաշտպանութեան բանակի կեդրոնական հաւաքակէտէն ներս Յունուարի 9-ին տեղի ունեցեր է հանդիսաւոր արարողութիւն՝ նուիրուած 2019 թուականի ձմեռային զօրակոչի մեկնարկին: Ինչպէս տեղեկացուցին Արցախի Հանրապետութեան պաշտպանութեան նախարարութեան մամուլի ծառայութենէն, Պաշտպանութեան Բանակին մէջ ծառայելու եկած առաջին նորակոչիկներուն շնորհաւորելու եւ իրենց խորհուրդներն ու մաղթանքները փոխանցելու եկեր էին Արցախի Հանրապետութեան Պաշտպանութեան Նախարար, Պաշտպանութեան Բանակի հրամանատար, գեներալ-մայոր Կարէն Աբրահամեանը, բարձրաստիճան հրամկազմի եւ հասարակական կազմակերպութիւններու ներկայացուցիչներ, հոգեւորականներ:

Շնորհաւորելով օրուայ հերոս հայրենիքի պաշտպաններուն սահմանադրութեամբ իրենց վերապահուած առաքելութիւնը ստանձնելնուն առթիւ՝ պաշտպանութեան նախարարը վստահեցուցեր է, որ բանակի հրամանատարութիւնը պիտի ընէ հնարաւոր ամեն բան, որ նորակոչիկները արագ յարմարուին եւ լիարժէք զինուորականներ դառնան, հանգամանք մը, որ տարածաշրջանային ու աշխարհաքաղաքական մարտահրաւէրները յաջողութեամբ դիմագրաւելու կարեւոր նախապայմաններէն է:

 

Input your search keywords and press Enter.