«Վանի արծաթը»` Թաւրիզի մէջ

Թաւրիզի հայկական թաղամասի Պարոն Աւագ փողոցը կը հատէ կեդրոնական Շարիաթի փողոցը, որով զբօսնելով մէկ անգամէն աչք կը ծակէ «Van Silver» անունը կրող փոքրիկ խանութը: Այն առաւել կը լուսարձակէ՝ ցուցափեղկերու շողշողացող արծաթեայ իրերուն հաշւոյն, քան հարեւան տաղաւարները:

Փոքր ծաղկամաններ, պատի ժամացոյցներ, մեծ թասեր, մոմակալներ, հայելիներ, յուշանուէրներ եւ այլ արծաթեայ իրեր: Իրանցիները կը սիրեն արծաթ եւ ոսկի, անոնք աւելի շատ կը գնեն այդ իրերը՝ քան հայերը կամ այլազգիները: Իրանցիները կը սիրեն կուտակել զարդեր, ոսկի ու արծաթեղէն՝ ապագայի կամ նեղ օրուայ համար, իսկ հայերը կը սիրեն ծախսել, խնճոյքներ կազմակերպել եւ վայելել իրենց ունեցածը:

Երեք հիմնական փուլ կ՛անցնի արծաթը՝ մինչ որ դառնայ որեւէ իր. սկզիբէն կը պատրաստուին բարակ արծաթեայ թերթիկներ, որմէ ետք անոնք ձեռքով կը փորագրուին եւ զարդանախշերով կը պատուին: Եւ որպէսզի արծաթեայ իրը ճերմկի ու փայլուն դառնայ՝ ըսել է թէ առեւտրային ու գրաւիչ տեսք ունենայ, պէտք է համապատասխան նիւթերով մշակուի:

Պատահական չէ որ խանութը ստացեր է «Van Silver» անունը: Արծաթագործութեան հիմքերը Թաւրիզի մէջ դրուեր են Վանի յայտնի արծաթագործներու դպրոցի աւանդոյթներով, քանի որ Վանն ալ եղած է հայկական արծաթագործութեան կեդրոնը:

Input your search keywords and press Enter.