«Արեւմտահայերէն Վիքիպեդիան՝ կրնայ կարեւոր խթան հանդիսանալ արեւմտահայերէնի գործածութեան համար»

Արեւմտահայերէն Վիքիպեդիան՝ վերջապէս կրցեր է ստանալ իր առանձին հարթակը Վիքիպեդիաներու ցանկին վրայ՝ hyw.wikipedia.org յղմամբ։

«2014 թուականէն ի վեր Արեւմտահայերէն Վիքիպեդիա ստեղծելու գաղափարին շուրջ համախմբուեր են հարիւր յիսունէն աւելի կամաւոր խմբագիրներ, որոնք պարբերաբար մասնակցեր են վերապատրաստման դասընթացներուն։ Այսօր մենք արդէն ունինք 7500-էն աւելի արեւմտահայերէն յօդուածներ, որոնք տեղակայուած են Արեւելահայերէն Վիքիպեդիային մէջ եւ շուտով կը տեղափոխուին Արեւմտահայերէն Վիքիպեդիա։ Մեր մարտահրաւէրը պէտք է ըլլայ այդ թիւն օր-օրի աւելցնելն ու անոնց որակը բարձրացնելը»,- կ՛ըսուի «ՎիքիմեդիաՀայաստան» գիտակրթական ՀԿ-ի տարածած հաղորդագրութեան մէջ: 
Արեւմտահայերէն Վիքիպեդիա նախագիծը համակարգող Ազնիւ Ստեփանեանը նշեր է, որ Արեւմտահայերէն Վիքիպեդիան կրնայ կարեւոր խթան հանդիսանալ արեւմտահայերէնի գործածութեան համար։

Արեւմտահայերէն Վիքիպեդիայի՝ որպէս առանձին հանրագիտարան դառնալու ջանքերուն նպաստեր են «Վիքիմեդիա Հայաստան» գիտակրթական հասարակական կազմակերպութիւնը եւ «Գալուստ Կիւլպէնկեան» հիմնարկութիւնը, որոնք անցնող տարիներուն աջակցեր են Արեւմտահայերէն Վիքիպեդիայի ստեղծմանն ու հովանաւորեր են նախագիծի միջոցառումները։

Արեւմտահայերէն Վիքիպեդիա ազատ հանրագիտարանին նպատակը եղեր է եւ կը մնայ բազմատեսակ որակեալ յօդուածներու ստեղծումն ու այդպիսով արեւմտահայերէնի բովանդակութեան շրջանառութեան մէջ կարեւոր ներդրում ունենալը։

 

Input your search keywords and press Enter.