Այսօր Մոնթէ Մելքոնեանի յիշատակի օրն է

Յունիսի 12-ին Հայաստանի ազգային հերոս, Արցախի հերոս, Արցախեան պատերազմի գործուն մասնակից, հրամանատար, ՀՀ բանակի փոխգնդապետ (1994, յետմահու), ՀԱՀԳԲ նախկին անդամ, Լիբանանի քաղաքացիական պատերազմի գործուն մասնակից Մոնթէ (Աւօ) Մելքոնեանի յիշատակի օրն է:

Մոնթէ Չարլզի Մելքոնեանը ծնած է 1957 թուականի Նոյեմբեր 25-ին Կալիֆոռնիոյ Վիսէյլիա քաղաքին մէջ, Հայերու դէմ կատարուած ցեղասպանութենէն փրկուած եւ ԱՄՆ հանգրուանած հայ ընտանիքէն ներս։

20 տարեկանին ընդունուեր է Կալիֆոռնիոյ Բերկլիի համալսարան եւ աւարտեր է զայն կրկնակի տիտղոսով՝ ստանալով «Հնագիտութեան եւ Ասիական պատմութեան մասնագէտի» վկայականներ։ Համալսարանէն ներս ուսանելու ընթացքին հիմներ է «Հայ ուսանողական միութիւնը»: 1978-ին ընդունուեր է Օքսֆորդի համալսարան, սակայն չէ աւարտած, ու մեկներ է Լիբանան, քաղաքացիական պատերազմի ժամանակ մասնակցեով (շուրջ 3 տարի) Բէյրութի հայկական թաղամասի պաշտպանական կռիւներուն: 1980-ի Մայիսէն` Հայաստանի ազատագրութեան հայ գաղտնի բանակի (ՀԱՀԳԲ` ԱՍԱԼԱ) գլխաւոր ռազմական մարզիչ: 1985-ի Նոյեմբեր 27-ին Փարիզի մէջ ձերբակալուեր է կեղծ անձնագիր ու պայթուցիկ նիւթեր ունենալու մեղադրանքով եւ բանտարկուեր է մինչեւ 1989-ն: 1990-ի Հոկտեմբերէն զինուորագրուեր է Արցախի պաշտպանութեան: 1992-ին եղած է Մարտունիի պաշտպանական շրջանի հրամանատար: Անոր ղեկավարութեամբ Մարտունին դարձաւ Արցախի ամենապաշտպանուած եւ ամենամարտունակ շրջանը։

Մոնթէն սպաննուեցաւ 1993 թուականի Յունիս 12-ին Աղդամի շրջանի Մարզիլի գիւղի մատոյցներուն վրայ։

Input your search keywords and press Enter.