ՊԱՇՏՕՆԱԿԱՆ ՀԱՂՈՐԴԱԳՐՈՒԹԻՒՆ

Արեւմտեան Հայաստանի Կառավարութիւնը կ’ողջունէ Եւրոպական Միութեան 15 Յուլիս 2019-ի պաշտօնական դիրքորոշումը Թիւրքիոյ նկատմամբ՝ գրաւեալ հիւսիսային Կիպրոսի ափամերձ ջուրերուն մէջ անոր ձեռնարկած հորատման անօրէն աշխատանքներուն պատճառով։

Միեւնոյն ժամանակ, Արեւմտեան Հայաստանի Կառավարութիւնը ընդհանուր առմամբ, պատժամիջոցներու քաղաքականութիւնը կը նկատէ որպէս միջազգային օրէնքի խախտման մէկ այլ տեսակ: Հետեւաբար, ողջմիտ եւ կառուցողական մօտեցում մը չէ՝ Թիւրքիոյ կողմէ միջազգային օրէնքի եւ իրաւունքներու խախտումին դիմաց հանդէս գալ մէկ այլ խախտումով:

Եթէ քաղաքակիրթ աշխարհը իսկապէս կը դատապարտէ Թիւրքիոյ շարունակական անհնազանդութիւնն ու խախտումները միջազգային օրէնքին եւ իրաւունքներուն նկատմամբ, որոնք տեղի կ’ունենան ոչ միայն այսօր, այլ 1918-էն ի վեր, ապա ժամն է որ վերատեսութեան ենթարկուին նոյն ներկայ արհեստական Թիւրքիոյ գոյութեան հիմքերը, որոնք նոյնպէս բացայայտ խախտումներ էին թէ միջազգային շարք մը օրէնքներու եւ իրաւունքներու եւ թէ մարդկանց իրաւունքներու եւ արդարութեան սկզբունքներուն:

Ախտը կը բուժուի իր բուն պատճառները վերացնելով, եւ ոչ թէ հետեւանքները դատապարտելով:

 

Արեւմտեան Հայաստանի Կառավարութեան Վարչապետի լրատուական գրասենեակ

Input your search keywords and press Enter.