Շբթ. Սպտ 26th, 2020

Վերջին մէկ տարուան ընթացքին Ռուսաստանի Դաշնութեան մօտ ՀՀ դեսպանութեան ջանքերով վերականգնուեր է Լազարեաններու պատմական առանձնատան մասը կազմող XVII-րդ դարու շինութիւնը, ուր ներկայիս տեղակայուած է դեսպանութեան կից գործող Հայկական մշակութային կեդրոնը։

Ինչպէս «Արմենպրես»-ին տեղեկացուցին Ռուսաստանի Դաշնութեան մօտ ՀՀ դեսպանութեան մամլոյ ծառայութենէն, XVII-րդ դարու մասնաշէնքի առաջին հարկին բացուեր է մշակութային կեդրոնի արուեստի սրահը, իսկ երկրորդ հարկին տեղակայուած են հայկական կիրակնօրեայ դպրոցը, կեդրոնին ներքոյ գործող մշակութային խմբակները՝ դուդուկի դպրոցը, ազգագրական պարերու, ձայնամշակման եւ թատերական խմբակներն ու նախադպրոցական խումբը։ Արուեստի սրահին մէջ մշտապէս կը կազմակերպուին ցուցահանդէսներ, համերգներ, ֆիլմերու ցուցադրութիւններ, հայ գործիչներուն նուիրուած միջոցառումներ։ Առանձնայատուկ ուշադրութեան արժանի է Այվազովսկիի, Սարեանի, Նալբանդեանի եւ այլ յայտնի նկարիչներու աշխատանքներու եզակի ցուցահանդէսը։

XVII-րդ դարու մասնաշէնքի վերականգնման աշխատանքներն իրականացուեր են ռուսաստանաբնակ հայ բարերարներու ոչ դրամային աջակցութեամբ։