Գերմուշի հայկական Սուրբ Աստուածածին վանքը վերացման վտանգի տակ է

Արեւմտեան Հայաստանի Ուրֆա (Եդեսիայ) նահանգի Հալիլիյէ գաւառի Գերմուշ թաղամասին գտնուող հայկական Սուրբ Աստուածածին եկեղեցին վերջնականապէս փլուզուելու վտանգին տակ է։ Ասոր մասին կ՛ահազանգեն թրքական լրատուամիջոցները։

Աղբիւրին համաձայն՝ Ուրֆա քաղաքէն 10 կմ հեռաւորութեան վրայ գտնուող եւ ենթադրաբար 19-րդ դարուն կառուցուած սոյն վանքը՝ իշխանութիւններու անտարբերութեան հետեւանքով աւերակի  վերածուեր է։ Հայկական եկեղեցիին կողքին գտնուող միւս հոգեւոր կառոյցը լիովին անհետացեր է, իսկ Գերմուշի եկեղեցին հազիւ կանգնած վիճակի է։

Եկեղեցիի վերականգման վերաբերեալ Հալիլիյէի գաւառապետարանին կողմէ ներկայացուած նախագիծը թէեւ անցեալ տարի հաստատուեր է , սակայն մինչ օրս միայն եկեղեցիի շուրջ ելեկտրական սիւներ կանգնեցուեր են։  Հրապարակման մէջ նշուած է նաեւ, որ եկեղեցին պարբերաբար կ՛ենթարկուի գանձագողերու աւերածութիւններուն եւ օրըստօրէ աւելի վատ վիճակի կը մատնուի։

Input your search keywords and press Enter.