Եւրոպական տէրութիւնները Իրանին կոչ կ՛ընեն հետեւելու 2015-ի միջուկային պայմանագիրին

Եւրոպական տէրութիւնները կոչ կ՛ընեն Իրանին՝ ձեռնպահ մնալու 2015 թուականի միջուկային պայմանագիրով ստանձնած պարտաւորութիւններուն հակասող որեւէ գործողութենէ։ Այս կոչը յաջորդեր է Իրանի կողմէ նախազգուշացման, որ Թեհրանը կը պատրաստուի արագացնելու ուրանի հարստացումը:

Այսօր կը լրանայ վերջնաժամկէտը, որ Իրանը տուեր էր Եւրոպական տէրութիւններուն՝ փրկելու համար համաձայնագիրը, ինչէն ետք կ՛ակնկալուի, որ Թեհրանը կը յայտարարէ, թէ ինչ գործողութիւններ պիտի ձեռնարկէ։

Երեկ Ֆրանսայի արտգործնախարարութիւնը յայտարարեր է, որ Իրանը «պէտք է զերծ մնայ որեւէ որոշակի գործողութենէ, որ չի համապատասխաներ իր ստանձնած պարտաւորութիւններուն, եւ կրնայ խանգարել լարուածութեան թուլացմանն ուղղուած ջանքերուն»:

Միաժամանակ, Մեծ Բրիտանիոյ արտգործնախարարութիւնը Իրանի կողմէ միջուկային ոլորտի հետազօտութիւններու եւ զարգացման ծրագիրներու սահմանափակումներու կասեցումը անուաներ է շատ մտահոգիչ։

Input your search keywords and press Enter.