Սեպտեմբերի 16-ին Պուտինը կը մեկնի Անկարա

Ռուսաստանի նախագահ Վլադիմիր Պուտինը յաջորդ Երկուշաբթի օրը՝ Սեպտեմբերի 16-ին, պիտի մեկնի Անկարա, ու պիտի գումարուի  Սուրիոյ հարցով թիւրք-ռուս-իրանական եռակողմ գագաթնաժողովը:

Կրեմլինի խօսնակ Դմիտրի Պեսկովի փոխանցմամբ, Պուտինը պիտի բանակցի Թիւրքիոյ եւ Իրանի նախագահներ Ռեջեպ Էրդողանի եւ Հասան Ռոհանիի հետ:

«Երկուշաբթի օրը կը նախատեսուի Սուրիոյ ճգնաժամի կարգաւորման հարցով «Աստանայի գործընթացի» երաշխաւորներու հանդիպումը: Ան տեղի պիտի ունենայ Անկարայի մէջ, եւ նախագահը պիտի մասնակցի ժողովին», — այսօր ըսեր է Պեսկովը:

ՏԱՍՍ լրատուական գործակալութիւնը կը նշէ, որ Ռուսաստանի, Թիւրքիոյ եւ Իրանի ղեկավարներուն մակարդակով առաջին գագաթնաժողովը տեղի ունեցեր էր 2017 թուականի Նոյեմբերին Սոչիի մէջ:

Այդ առաջին քննարկումէն յետոյ կողմերը յայտարարեր էին, որ Սուրիոյ ապառազմականացուած գօտիներուն ստեղծումը պէտք չէ սպառնայ Սուրիոյ տարածքային ամբողջականութեան:

Input your search keywords and press Enter.