Մատենադարանը կը հիւրընկալէ Յովհաննէս Թումանեանի 150-ամեակին նուիրուած միջազգային գիտաժողով

Յովհաննէս Թումանեանի թանգարանը Հոկտեմբերի 11-էն 13-ը կը կազմակերպէ մեծ գրողի ծննդեան 150-ամեակին նուիրուած միջազգային գիտաժողով եւ ցուցահանդէս:

«Արմենպրես»-ի հաղորդմամբ՝ գիտաժողովը նուիրուած է Թումանեանի թարգմանական հեքիաթներու ուսումնասիրութեան եւ համաշխարհային թարգմանական հեքիաթագրութեան ասպարեզէն ներս վերջինիս համարժէք գնահատման:

Յովհաննէս Թումանեանի ծննդեան 150-ամեայ յոբելեանը 2017 թ.-ին ընդգրկուեր է ՅՈՒՆԵՍԿՕ-ի՝ «Հռչակաւոր մարդկանց եւ կարեւոր իրադարձութիւններու 2018-2019 թուականներու օրացոյցին մէջ»։

«Արեւելք-Արեւմուտք. Յովհ. Թումանեանը եւ հեքիաթի թարգմանութեան արուեստը» խորագիրը կրող միջազգային գիտաժողովին բացումը տեղի պիտի ունենայ Հոկտեմբերի 11-ին Մատենադարանի գիտական մասնաշէնքի նիստերու դահլիճէն ներս:

Միջազգային գիտաժողովն ու ցուցահանդէսը կ՛իրականացուին ՅՈՒՆԵՍԿՕ-ի մասնակցութեան ծրագիրի շրջանակին մէջ։

Input your search keywords and press Enter.