Թբիլիսիի մէջ կը տեղադրուի Յովհաննէս Թումանեանի յուշարձանը

Վրաստանի մէջ Հայաստանի դեսպանութիւնը աշխատաքներ կը տանի՝ Թբիլիսիի Երեւանեան պուրակի տարածքին Յովհաննէս Թումանեանի արձանը տեղադրելու ուղղութեամբ:

Ինչպէս կը տեղեկացնէ «Արմենպրես»-ը, Վրաստանի մշակոյթի նախարարութեան կողմէ  կազմակերպուած Յովհաննէս Թումանեանի ծննդեան 150-ամեակին նուիրուած «Տասը հեքիաթ», «Թումանեան-150» (երկուքն ալ զուգահեռ` հայերէն ու վրացերէն) եւ «Թումանեան լուսեղէն» (վրացերէն) գիրքերու շնորհանդէսին ժամանակ՝ ասոր մասին ըսաւ Վրաստանի մէջ Հայաստանի արտակարգ եւ լիազօր դեսպան Ռուբէն Սադոյեանը:

Յովհաննէս Թումանեանի աճիւնը յուղարկաւորուած է Թբիլիսիի հայ գրողներու եւ հասարակական գործիչներու Խոջիվանքի պանթեոնէն ներս: Անոր անունը անխզելիօրէն կապուած է Վրաստանի ու վրացիներու հետ: Վրաստանի մէջ Յովհաննէս Թումանեանը մեծ ժողովրդականութիւն վայելող ու սիրուած բանաստեղծներէն մէկն է: Անոր լաւագոյն երկերը թարգմանուած են վրացերէնի: Անոր ստեղծագործութիւնները կ՛ուսումնասիրեն Վրաստանի դպրոցներէն  ներս:

Input your search keywords and press Enter.