Տիկնայք, Պարոնայք, Յարգելի Հայրենակիցներ, 

Յենուելով ազգային եւ միջազգային հետեւեալ հանգամանքներուն վրայ․

ա) Մեր կարոյցին դէմ կատարուած սադրանքներու եւ յեղաշրջման փորձերու փաստերուն դիմաց՝ մեր պետական համակարգի կայունութեան,

բ) Մեր հայրենիքի Թիւրքիոյ կողմէ բռնագրաւուած ըլլալը եւ Միջին Արեւելքի տարածքին այսօր չյայտարարուած պատերազմի կարգավիճակին ազդեցութիւնը մեր ժողովուրդի գոյութեան,

գ) Արեւմտեան Հայաստանի Հայ ժողովուրդին դէմ կատարուած ցեղասպանութեան, եւ անոր որպէս հայ ապրելու իրաւունքի ժխտողականութեան շարունակականութեան,

դ) Մեր հայրենակիցներուն աշխարհի չորս կողմերը ցրուած ըլլալնուն,

Կ՛ուզեմ որ վստահ ըլլաք, մեր դիրքերը նորեն պարզ են եւ պինդ, 

Հայ ժողովուրդի միասնականութեամբ՝ այս բոլոր յանցագործութիւնները պիտի ունենան եւ ստանան համարժէք պատասխան:

Սիրելի հայրենակիցներ, 

Ինչպէս ընդունուած է ամեն տարի, թոյլ տուէք ինծի, որ Հայ ժողովրդին եւ մեր բոլոր քաղաքացիներուն մաղթեմ յաջողութիւն, կամք եւ կորով, յանուն մեր իրաւունքներուն եւ հայրենատիրութեան, պահանջատիրութեան խնդիրի արդարացի լուծման՝ հիմք ընդունելով այն փաստը, որ մենք բնիկ ազգ ենք, ժողովուրդն ենք մեր հայրենիքի, նաեւ այսպիսի փաստեր, 

Յունուար

2019 թ.-ի 11 Յունուարին — Նշեցինք —Ռուսական հռչակագիրի հարիւրամեակը, որով ճանչցուեցաւ Արեւմտեան Հայաստանի հայութեան ինքնորոշման իրաւունքը, մինչեւ անոր անկախութեան հասնիլը : 

2019թ.-ի 19 Յունուարին Նշեցինք Արեւմտեան Հայաստանի Հանրապետութեան Անկախութեան տարեդարձը, Արեւմտեան Հայաստանի Հանրապետութեան  Ազգային Ժողովի (Խորհրդարանի) պատգամաւորական ընտրութիւններուն արդիւնքները հրապարակեցինք եւ կազմակերպեցինք Արեւմտեան Հայաստանի Հանրապետութեան Ազգային Ժողովի (Խորհրդարանի) Երկրորդ գումարման Առաջին նստաշրջանը: 

2019թ.-ի 20 Յունուարին Նշեցինք Արեւմտեան Հայաստանի Հանրապետութեան Նախագահ-ի ընտրութիւնը եւ նոր Կառավարութեան կազմը:

Փետրուար

2019թ.-ի 01 Փետրուարին Հայկական Լէգիոնի ստեղծման հարիւրամեակը՝ ի յիշատակ հայ կամաւորներուն, որ ինկան պատուոյ դաշտին վրայ:

2019 թ.-ի 04 Փետրուարին նշեցինք Արեւմտեան Հայաստանի Հանրապետութեան Կառավարութեան ստեղծման 8-րդ տարեդարձը:

2019 թ.-ի  22 Փետրուարին նշեցինք Առաջին համաշխարհային պատերազմի աւարտի եւ Վերսայլի խաղաղութեան Համաժողովի հարիւրամեակը:

Մարտ

2019թ.-ի 21  Մարտին նշեցինք Գիշերահաւասարը:

Ապրիլ

2019թ.-ի 24 Ապրիլին Նշեցինք, 1894-էն միչեւ 1923 թ. Արեւմտեան Հայաստանի գրաւուած տարածքներէն ներս բնիկ հայ ժողովուրդին դէմ թրքական երեք յաջորդական կառավարութիւններուն կողմէ իրագործուած Ցեղասպանութեան յիշատակը:

Մայիս

2019 թ.-ի 05 Մայիսին Թիւ 74 հրամանագիրով Անդրադարձանք Սան-Ռէմոյի Խաղաղութեան վեհաժողովի հարիւրամեակին, Սեւրի միջազգային Դաշնագիրին:

Քանի որ  1920-ի Մայիս 11-ին Արեւմտեան Հայաստանի տարածքին հայկական Պետութեան դէ յուրէ ճանաչումով 1920-ի Օգոստոս 10-ին Սեւրի մէջ ստորագրուեցաւ Խաղաղութեան միջազգային Դաշնագիրը, հետեւանքը եղաւ 1920 թուականի Նոյեմբեր 22-ին Նախագահ Վուդրօ Ուիլսոնի Իրաւարար վճիռը։

2019 թ.-ի 24 Մայիսին Նշեցինք Արեւմտեան Հայաստանի Ազգային ժողովի (Խորհրդարանի) ձեւաւորման 6-րդ տարեդարձը:

Յունիս

2019 թ.-ի 01 Յունիսին Մասնակցեցանք Արցախի մէջ կայանալիք Եւրոպայի գաւաթի մրցաշարին:

2019 թ.-ի 24 Յունիսին Նշեցինք Արեւմտեան   Հայաստանի   Հանրապետութեան կողմէ Սեւրի Դաշնագիրը վաւերացնելու 3-րդ տարեդարձը:

Յուլիս

2019թ.-ի 13 Յուլիսին Մասնակցեցանք Միացեալ Ազգերու Կազմակերպութեան (ՄԱԿ) Համագումարին՝ Բնիկ ժողովուրդներու իրաւունքներուն վերաբերեալ:

Օգոստոս

2019 թ.-ի 4 Օգոստոսին Նշեցինք Կիլիկիոյ Անկախութեան Յայտարարութեան 99-րդ տարեդարձը եւ Կիլիկիոյ Հայերու Ազգային Խորհուրդի վերահիմնադրման երկրորդ տարեդարձը :

2019թ.-ի 10 Օգոստոսին Նշեցինք Սեւրի Դաշնագիրի ստորագրութեան 99-րդ տարեդարձը:

Սեպտեմբեր

2019 թ.-ի 07 Սեպտեմբերին կազմակերպեցինք Արեւմտեան Հայաստանի Ազգային Խորհուրդի առաջին ամառային համալսարանը:

2019 թ.-ի 27 Սեպտեմբերին Մասնակցեցանք Բնիկ ժողովուրդներու միջազգային դատարանի (IPIC) դատաւորներու նշանակման:

Նոյեմբեր

2019թ.-ի 02 Նոյեմբերին յարգանքի տուրք մատուցեցինք Պարոն Արդէն Շելլեֆեանին:

2019թ.-ի 15  Նոյեմբերին Նշեցինք Արեւելքի լէգիոնին կողմէ Կիլիկիոյ ազատագրութեան 100-րդ տարեդարձը:

2019թ.-ի 22 Նոյեմբերին Նշեցինք Լէոնիդ Ազգալդեանի, մեր հրամանատարի, անմահութեան — 77-րդ տարեդարձը եւ Նշեցինք ԱՄՆ-ի նախագահ Վուդրօ Ուիլսոնի իրաւարար Վճիռի 99-րդ տարեդարձը:

2019թ.-ի 30 Նոյեմբերին Հաստատեցինք Արեւմտեան Հայաստանի Հանրապետութեան Ազգային Ժողովի (Խորհրդարանի) պատգամաւորներու Նախագահական Խորհուրդի որոշումը՝ 2020-ին ընդունելու եւ կազմակերպելու Երկրորդ գումարման Երկրորդ նստաշրջանը:

 

Դեկտեմբեր

2019թ.-ի 05 Դեկտեմբերին որոշում առինք, որ Արեւմտեան Հայաստանի Ֆուտբոլի ազգային հաւաքականը մասնակցի CONIFA-ի աշխարհի առաջնութեան՝ կայանալիք Հիւսիսային Մակեդոնիոյ մէջ – 2020-ի Յունիսին:

2019թ.-ի 14 Դեկտեմբերին ողջիւնեցինք ԱՄՆ-ի Սենատին կողմէ արտայայտուած  մարդկային կեցուածքը՝ երբ յատկապէս ընդունեց H. Res. 296 թիւի բանաձեւը:

2019թ.-ի 15 Դեկտեմբերին ընդունեցինք՝ ՊՈԼՍՈՅ ԵՒ ԿԱՐԻՆԻ ժամանակաւոր ինքնիշխան պատրիարքարաններուն վերականգնումը Զուիցերիոյ մէջ:

2019թ.- ի 17 Դեկտեմբերին  մեր ուղերձը՝ Արեւմտեան Հայաստանի Ազգային Խորհուրդի 15-րդ տարեդարձին առիթով, ուր յիշեցուցինք, որ Արեւմտեան Հայաստանի Հանրապետութեան Սահմանադրութեան համապատասխան՝ Արեւմտեան Հայաստանի Ազգային Խորհուրդը պետական մարմիններու քաղաքական բաժինն է:

Թող 2020 թուականը ըլլայ արդար՝ Արեւմտեան Հայաստանի իրաւունքները վերականգնելու տարի: 

Միասին 2020 թուականին մեր ամենօրեայ աշխատանքներուն զուգահեռ՝ պիտի ունենանք կարեւոր հանդիպումներ, նաեւ պիտի նշենք Արեւմտեան Հայաստանի պետութեան անկախութեան հարիւրամեակը՝  Սեւրի խաղաղութեան Դաշնագրի  հարիւրամեակին հետ:

Թոյլ տուէք, որ շնորհաւորեմ Հայրենիքի մէջ եւ Հայրենիքէն դուրս ապրող մեր հայրենակիցներու Նոր Տարին: 

Կը Մաղթեմ Արեւմտեան Հայաստանի պաշտպանական ուժերուն, Միջին արեւելքի հայերուն եւ այլ բնիկ ժողովուրդներուն եւ փոքրամասնութիւներուն (Յոյներուն, Ասորիներուն, Եզդիներուն, Ալեւիներուն եւ Քիւրդերուն) ուժեղ դիմադրութիւն՝ մինչեւ խաղաղութիւն, շուտով նորէն կը միանանք մեր հայրենիքին վրայ:

Մենք ամեն ինչ կ՛ընենք, որպէսզի 2020-թուականը ըլլայ վճռական և դրական փոփոխութիւններու տարի՝ մեր պետական համակարգի մարմիններուն միջոցով, 

Արեւմտեան Հայաստանի Ազգային Խորհուրդի անդամներուն, Արեւմտեան Հայաստանի Հանրապետութեան Կառավարութեան անդամներուն, Ազգային ժողովի նորընտիր պատգամաւորներուն, եւ արտերկրի հայկական կառոյցներուն կը մաղթեմ արդիւնաւետ տարի, թող այդ դրական փոփոխութիւնը հիմք հանդիսանայ խորքային եւ ներդաշնակ գործունէութիւն իրականացնելու համար, 

Ինչպէս միշտ՝ մենք ուժեղ ենք միասնական, 

Եւս մէկ անգամ կը շնորհաւորեմ բոլորի Սուրբ Ծնունդն ու Նոր Տարին, եւ կը ցանկանամ գալիք տարին նորանոր յաջողութիւններ, նպատակներու եւ երազանքներու իրականացում: 

Մեր Ազգը պայքարի մէջ է, բայց այս օրուան պայքարը մե՛ր սերունդի պայքարն է, կ՛ուզեմ ըսել, որ Հաւատքով, Սիրով եւ Գիտակցութեամբ որոշուած մեր ինքնուրոյն  պայքարն է, 

Փառք մեր նախնիներուն, 

կեցցէ Արեւմտեան Հայաստանի Հանրապետութիւնը, 

կեցցէ մեր յարգելի եւ սիրելի ժողովուրդը:

Դեկեմբեր 31, 2019թ.

Արմենակ Աբրահամեան

Արեւմտեան Հայաստանի Հանրապետութեան Նախագահ

Input your search keywords and press Enter.