ՀՀ ղեկավարութիւնը այցելեր է Ծիծեռնակաբերդի յուշահամալիր յարգելու Բաքուի ջարդերու զոհերուն յիշատակը

Բաքուի մէջ իրականացուած հայերու ջարդի 30-րդ տարելիցի կապակցութեամբ ՀՀ վարչապետ Նիկոլ Փաշինեանը, Ամենայն Հայոց Կաթողիկոս Գարեգին Բ-ը, Ազգային ժողովի նախագահ Արարատ Միրզոյեանը, բարձրաստիճան այլ պաշտօնեաներ այցելեր են Ծիծեռնակաբերդի յուշահամալիր` յարգանքի տուրք մատուցելու ոճրագործութեան զոհերու յիշատակին։ «Արմենպրես»-ի փոխանցմամբ՝ պետական այրերը ծաղկեպսակ դրած են զոհերու յիշատակը յաւերժացնող յուշարձանին։

Երեսուն տարի առաջ՝ 1990թ.-ի Յունուար 13-էն 19-ն Ատրպէյջանի մայրաքաղաք Բաքուի մէջ դաժան սպանդի, բռնարարքներու, բռնաբարութիւններու  զոհ դարձան եւ բռնի տեղահանուեցան տասնեակ հազարաւոր հայեր, շատերուն ալ ողջակիզեցին: Հայերու նկատմամբ 6 օր դրսեւորուած վայրագութիւններէն ետք շուրջ 250 հազար հայ բնակիչ ունեցող քաղաքը հայաթափուեցաւ: Տեղի ունեցած ջարդերը կազմակերպուած էին Ատրպէյջանի ժողովրդական ճակատին (ԱԺՃ) կողմէ, իսկ իշխանութիւնները կը հովանաւորէին զանոնք:

Բաքուի եւ Սումգայիթի մէջ հայերու դէմ իրականացուած գործողութիւնները կրած են կազմակերպուած բնոյթ, կամ առնուազն իրականացուեր են Ատրպէյջանի իշխանութիւններու թողտւութեամբ:

Input your search keywords and press Enter.