Վանայ լիճի կղզիներու վանքերուն մէջ ստեղծուած հարիւրաւոր մատեաններուն մասին՝ նոր գիրքով

Լոյս տեսեր է Մատենադարանի աւագ գիտաշխատող, պատմական գիտութիւններու թեկնածու Լուսինէ Թումանեանի «Վանայ լիճի կղզիներու վանքերու գրչութեան կեդրոնները» խորագիրով աշխատութիւնը: Գիրքի խմբագիրն է Մատենադարանի գիտական գիծով փոխտնօրէն, պատմական գիտութիւններու դոկտոր, պրոֆեսոր Կարէն Մաթեւոսեանը:

Մեսրոպ Մաշտոցի անուան հին ձեռագիրներու գիտահետազօտական ինստիտուտէն կը տեղեկացնեն, որ գիրքով Վանայ լիճի Ախթամար, Լիմ եւ Կտուց կղզիներուն վանքերը ներկայացուած են որպէս գրչութեան կեդրոններ, ամբողջացուած է անոնցմէ մեզ յայտնի ձեռագրական ժառանգութիւնը, եւ կազմուած են այդ ձեռագիրներու ցանկերը: Ձեռագրական նիւթերուն հիման վրայ լուսաբանուած են նաեւ նշեալ վանքերու պատմութեան բազում անյայտ էջեր:

Վանայ լիճի կղզիներուն վանքերը հարկադրաբար դադրեր են գործելէ Առաջին աշխարհամարտի տարիներուն եւ այժմ լքուած ու անբնակ են: Ուստի` այս վանքերուն մէջ դարեր շարունակ ծաւալուած հայկական մշակութային կեանքի վկաներն այսօր այնտեղ ստեղծուած հարիւրաւոր մատեաններն են, որոնց ուսումնասիրութեան նուիրուած է սոյն աշխատութիւնը:

 

Input your search keywords and press Enter.