Աշխարհահռչակ տուտուկահար Ջիվան Գասպարեանի վերջին հրաժեշտի արարողութիւնը տեղի կունենայ «Արամ Խաչատրեան» համերգասրահին մէջ (Մեսրոպ Մաշտոցի պողոտա 46) Յուլիսի 24-ին` ժամը 11:00-14:00: Աճիւնը կամփոփուի Կոմիտասի անուան պանթէոնին մէջ:

Այս առնչութեամբ կառավարական յանձնաժողովի հաղորդագրութեան մէջ կ՛ըսուի. «Հայկական մշակոյթը կրած է անդառնալի կորուստ: Կեանքէն հեռացած է Ջիվան Գասպարեանը, անուն, որ չունի մեկնաբանութիւններու կարիք ո՛չ Հայաստանի մէջ, ո՛չ  Հայաստանի սահմաններէն  դուրս` Արեւելքէն Արեւմուտք եւ Հարաւէն Հիւսիս:

Ան այնպիսի երաժիշտ էր, ուրու ձեռքերուն մէջ հայոց աւանդական ծիրանափողը կը խօսէր մեր ազգային կեցութեան ակունքներէն: Սակայն, միաժամանակ, այդ հոգեպարար խօսքը հասկանալի, ընդունելի ու սիրելի կը դառնար տարբեր միջօրեականներուն, ո՛չ միայն կատարողական բացառիկ վարպետութեան, այլեւ մարդկային ներաշխարհի ամենանուրբ լարերն արթնացնելու եւ  համընդհանուր մագնիսական դաշտ մը ստեղծելու տաղանդի կախարդանքով: Հիրավի, ան գումարման նշան էր Հայոց հողի եւ մեզ շրջապատող աշխարհի միջեւ»։

Leave a Reply