Յուլիսի 26-ին, Հայաստանի մէջ Միացեալ Նահանգներու դեսպան Լին Թրէյսի, Հայաստանի պաշտպանութեան նախարարութեան ներկայացուցիչներուն ընկերակցութեամբ այցելեց Գեղարքունիքի մարզ: Զօրամիաւորման հրամանատար զօր. Արայիկ Յարութիւնեան դեսպանին ներկայացուց հայ-ազրպէյճանական սահմանին տիրող իրավիճակը, ապա անոնք այցելեցին Վերին Շորժայի հատուածի սահմանագիծ:

Հայաստանի պաշտպանութեան նախարարութեան տեղեկատուութեան եւ հասարակութեան հետ կապերու վարչութենէն յայտնեցին, որ դեսպան Թրէյսի վերահաստատեց Միացեալ Նահանգներու մտահոգութիւնը` հայ-ազրպէյճանական սահմանի երկայնքին տեղի ունեցող դէպքերուն վերաբերեալ եւ ընդգծեց, որ Միացեալ Նահանգներ կը մերժեն ուժի կիրարկումը սահմանազատում իրականացնելու պարագային:

Ըստ աղբիւրին, դեսպանը նաեւ շեշտեց, որ Միացեալ Նահանգները, իբրեւ ԵԱՀԿ-ի Մինսքի խմբակի համանախագահ երկիր, խորապէս հաւատարիմ կը մնան ղարաբաղեան տագնապի երկարաժամկէտ քաղաքական լուծման հասնելու նպատակով բոլոր կողմերուն հետ աշխատելու հոլովոյթին: Միաժամանակ, ըստ Լին Թրէյսիի, Միացեալ Նահանգներ կողմերէն կը պահանջեն կարելի եղածին չափ արագ վերադառնալ Մինսքի խմբակի համանախագահներու մակարդակով ընթացող բանակցութիւններուն: