ԱՀ Ասկերանի շրջանի Խնածախ համայնքն ունի 860 բնակիչ. պատերազմէն ետք բոլորն  վերադարձեր են գիւղ։

Այս մասին «Արցախփրես»-ի թղթակիցի հետ զրոյցի ժամանակ ըսած է Խնածախի համայնքապետ Մհեր Նիկողոսեանը: «Գիւղին մէջ վերաբնակեցուեր է 53 ընտանիք՝ 204 հոգիով: Դպրոցը՝ 60 աշակերտներով, վերաբացուեր է Դեկտեմբեր ամիսէն: Մանկապարտեզ չունինք, բայց մանկապարտեզի ենթակայ շուրջ 43 երեխայ կայ գիւղին մէջ: Համայնքին մէջ կը գործէ գիւղապետարան, մշակոյթի տուն, բուժկէտ, որոնց շէնքի պայմանները կը գտնուին լաւ վիճակի: Օրերս «Ավրորա»֊ի նախաձեռնութեամբ «Ջրաղացներ» բարեգործական հիմնադրամի եւ «Love Does» կազմակերպութեան համատեղ ջանքերով համայնքին մէջ հացի փուռ բացուած է: Այս եւս գիւղացիներուն աշխատանքով ապահովելու հնարաւորութիւն է։ Գիւղը գազաֆիկացուած է, ապահոված էլեկտրաէներգիայով: Ունինք ջուրի խնդիր. ջուր կը ստանանք օրական մի քանի ժամով»,- նշեց Մ. Նիկողոսեանը: Խօսելով գիւղացիներու զբաղուածութեան եւ անոնց ապագայ ծրագիրներու մասին՝ մեր զրուցակիցը նշած է, որ բնակչութեան մեծ մասն կ՛աշխատի մայրաքաղաք Ստեփանակերտի մէջ, միւս մասը կը զբաղուի անասնապահութեամբ ու գիւղատնտեսութեամբ: