ԱՀ Մարտունի շրջանի Մուշկապատ համայնքն ունի 270 բնակիչ. պատերազմէն ետք բոլորն  վերադարձած են հայրենի եզերք:

Այս մասին ըսած է Մուշկապատի համայնքապետ Ռուբեն Մուսայելեանը:

«Գիւղին մէջ վերաբնակեցուած է 1 ընտանիք Շուշիէն: Մէկ տուն արդեն վերանորոգուեր է, երկուքի բարեկարգման աշխատանքներն ընթացքի մէջ են, որպէսզի տրամադրենք տեղահանուած ընտանիքներուն: Դպրոցն ունի 43 աշակերտ, որը վերաբացուած է Դեկտեմբեր ամիսէն: Մանկապարտեզ չունինք. բայց մանկապարտեզի ենթակայ 35 սան ունինք:

Համայնքին մէջ կը գործէ համայնքային կենտրոն, բուժկէտ, 160 նստատեղ ունեցող ակումբ, գրադարան, որը համալրուած է անհրաժեշտ գրականութեամբ. հանդիսութիւններու սրահ չունինք: Գիւղին մէջ կը գտնուի 17-րդ դարի Սուրբ Աստուածածին եկեղեցին, որը պետական միջոցներով եւ բարերարի աջակցութեամբ վերանորոգուած է 2017 թուականին: 

Ամառային շրջանին ունինք ջուրի խնդիր. 6-րդ օրն է՝ ջուր չունինք, եղածի պարագային  օրական կէս ժամ ջուր կը ստանանք։ Գիւղը ապահովված է էլեկտրաէներգիայով, գազաֆիկացուած չէ, սակայն անհրաժեշտութիւնը  զգալի է»,- նշեց Ռուբեն Մուսայելեանը։

Համայնքապետը նշած է, որ բնակչութեան մեծ մասը կը զբաղուի անասնապահութեամբ, գիւղատնտեսութեամբ ու հողագործութեամբ, ոմանք ալ կը զբաղուին մեղվաբուծութեամբ. Գիւղին մէջ կայ 100 մեղվաընտանիք: