Թուրքիայի խորհրդարանական ընդդիմութեան մաս կազմող, քրտամետ «Ժողովուրդներու դեմոկրատական կուսակցութեան» Վանի եւ Տիգրանակերտի պատգամաւորներ Մուրաթ Սարըսաչը եւ Հիշիար Օզսոյը Վանի հայկական գերեզմանատան աւիրման հարցը բարձրաձայնած են մեջլիսի ժամանակ։

Վանի նահանգի Տուշպա շրջանի Քալեջիք թաղամասին մէջ գտնուող հայկական գերեզմանատունը շինարարական տեխնիկայի միջոցով աւիրուած է այն անձի կողմէ, որը հանդէս եկած է որպէս տուեալ տարածքի սեփականատեր։ Շիրմաքարերը տեղաշարժուեր են, իսկ հողի երեսին  յայտնուեր են ոսկրակտորներ։

Ընդդիմադիր պատգամաւորները դժգոհած են, որ չի իրականացուիր կրոնական ու մշակութային շինութիւններու պետական պատշաճ պահպանութիւն, որու հետեւանքով  աւիրուեր է Վանի հայկական գերեզմանատունը։

Պատգամաւոր Մուրաթ Սարըսաչը յիշեցուցած է, որ 2017-ին Վանի մէկ այլ հայկական գերեզմանատան վրայ ամենայն թողտուութեամբ կառուցուած էր պետքարան, հանդերձարան ու ավտոկայանատեղի, իսկ գանձագողերու արարքները  վերջ չէ տրուած։