Կը ներկայացնենք ՀՀ ՄԻՊ Արման Թաթոյեանի ֆեյսպուքեան էջին կատարած գրառումէն հատուածներ․ «Առաւօտ ժամը 11-էն ատրպէյճանական զինծառայողները դիտաւորեալ հրդեհներ ձգած են Սոթք եւ Կութ գիւղերու հարեւանութեամբ: Օրուայ ընթացքին ՀՀ Գեղարքունիքի մարզի Սոթք գիւղի ուղղութեամբ հրդեհները մարուած են, իսկ Կութի հարեւանութեամբ հրդեհները չեն մարած ու տարածուած են եղանակային պայմաններով: Հրապարակուող լուսանկարները ցոյց կուտան այս պահի վիճակը:

Հատուկ կը նշեմ, որ այս վայրերուն մէջ համայնքներու բնակիչներու խոտհարքերն ու արոտավայրերն են, իսկ հրդեհներով անոնք պարզապէս կը ոչնչացուին: Հաշուի առնելով նաեւ, որ ատրպէյճանական զինուած ուժերը ներխուժած ու տեղակայուած են գիւղերու անմիջական հարեւանութեամբ՝ ՀՀ ինքնիշխան տարածքին մէջ, ապա հրդեհներն իրական վտանգ կը ներկայացնեն նաեւ գիւղերու քաղաքացիական բնակչութեան համար:

Սիւնիքի, Գեղարքունիքի ու Արարատի մէջ ատրպէյճանական վերջին ժամանակաշրջանի արարքներու, այդ թիւին՝ կրակոցներու փաստերը կը վկայեն, որ անոնք կը դառնան աւելի  վտանգաւոր քաղաքացիական բնակիչներու համար եւ կը կրեն զանգուածային բնոյթ»: 

ՀՀ մարդու իրաւունքներու պաշտպանի այս հերթական հաղորդումը Օգոստոսի 30-ին համապատասխան առաջարկներով կամ պահանջներով պաշտօնապէս կ՛ուղարկուի միջազգային կառոյցներուն, ինչպէս նաեւ ՀՀ պետական մարմիններուն ու ՀՀ քաղաքացիական հասարակութեան կազմակերպութիւններուն: