2022 թ. Սեպտեմբերին նախատեսուած է Հայաստանի մէջ կազմակերպել «STARMUS FESTIVAL VI. 50 տարի Մարսի վրայ» փառատօնը: Այն կը կազմակերպուի «50 տարի Մարսի վրայ» խորագիրի ներքոյ եւ նուիրուած կ՛ըլլայ Մարսի վրայ առաջին վայրէջքի 50-ամեակին. 1971 թ. Խորհրդային Միութիւնը Մարս իջեցուցած է «Մարս-3» սարքը, որու մէջ կը գտնուէր ազգութեամբ հայ գիտնական-ինժեներ Ալեքսանտր Քեմուրջեանի «մարսագնացը»:

«STARMUS» փառատօնի տեսլականն է ստեղծել երիտասարդ սերունդի համար նոր ձեւաչափեր եւ հնարաւորութիւններ, ոգեշնչել նոր հմտութիւններ ձեռք բերելու ցանկութեամբ, բարձրացնել գիտելիքի տարածման եւ ուսումնառութեան մակարդակը՝ այն հասանելի դարձնելով բոլորի համար:

«STARMUS» փառատօնը Հայաստանի մէջ կ՛ըլլայ շատ մատչելի եւ հասանելի ուսանողներու, դպրոցականներու եւ առհասարակ բոլոր քաղաքացիներու համար: Նախատեսուած է, որ հինգ օր շարունակուող փառատօնին կը մասնակցին տասնեակ հազարաւոր քաղաքացիներ եւ հիւրեր արտերկրէն:

Փառատօնին նախատեսուած է 70-է աւելի աշխարհահռչակ տիեզերագնացներու, ինժեներներու, գիտնականներու, ինչպէս նաեւ Նոբելիան մրցանակակիրներու մասնակցութիւն: Կը կազմակերպուի 1 համերգ՝ համաշխարհային երաժշտութեան գերաստղի մասնակցութեամբ, այլ համերգներ՝ եւս 5 աշխարհահռչակ աստղերու մասնակցութեամբ: «STARMUS»-ի հայաստանեան փառատօնին ընդառաջ կազմակերպիչներն աշխարհի առնուազն 4 մեգապոլիսներու մէջ նախատեսած են կազմակերպել շնորհանդեսներ եւ մամուլի ասուլիսներ։