ՀՀ-ի մէջ ԱՄՆ դեսպան Լին Թրեյսիի վերջին հարցազրոյցը աղմուկ  բարձրացուցած է Պաքուի մէջ։ Պաշտօնեաներն ու քարոզչութիւնը Թրեյսիին «յիշեցուցած» են, որ     Արցախի հակամարտութիւն ու կարգավիճակի խնդիր չկայ, եւ թէ ամերիկեան կողմի նման պահուածքը վտանգի կը դնէ Մինսքի խումբի յետագայ գործունէութիւնը։

«30 տարուայ պատերազմի եւ լարուածութեան իրավիճակը չի կարող հանգուցալուծուիլ մէկ գիշերուայ ընթացքին: Այնուհետեւ, մենք կը հասկնանք, որ կան որոշ հիմնախնդիրներ, որոնք պէտք է լուծուին, անոնցմէ մէկը, ինչպէս նախկին ժամանակ ըսած եմ, այն է, որ մենք Արցախի կարգավիճակը որոշուած չենք համարէր եւ հետեւաբար կը շարունակենք պահել այդ հարցը Մինսքի խումբի օրակարգին», ըսած էր դեսպանը։

Պաքուի հակաարեւմտեան ընդգծուած կեցուածքը դրսեւորեց այն պահէն, երբ Մինսքի խումբի արեւմտեան համանախագահներն յայտարարեցին, որ եռակողմ յայտարարութիւնը խնդիրի լուծում չէ։ Ընդ որուն, այս կեցուածքը եւ քարոզչութիւնը կը համակարգուի Կրեմլի համապատասխան բաժինէն, եւ անոր ընդգծուած օրինակը «Ֆրանսիայի կողմէ Հայաստանը պոկելու»՝ անանուն աղբիւրին հղումով համատեղ քարոզչական աղմուկն էր։

Հատկանշական է, որ Երեւանի մէջ ԱՄՆ դեսպանատունն արձագանքած է Պաքուի այս աղմուկին եւ վերահաստատած է այս հանգամանքը․ դեսպանատան հաղորդագրութեան մէջ նշուած է, որ «ԵԱՀԿ Մինսքի խումբի համանախագահներու հովանիի ներքոյ միայն համապարփակ լուծումը, որն կ՛անդրադառնայ բոլոր չի լուծուած խնդիրներուն, կարող է կարգաւորել երկու երկիրներու միջեւ յարաբերութիւնները եւ թոյլ տալ տարածաշրջանի բնակիչներուն միասին ապրելու խաղաղ պայմաններով»։