Հայաստանի Հանրապետութիւնը Հագայի Արդարադատութեան միջազգային դատարանին մէջ գործ հարուցած է Ատրպէյճանի դէմ՝ Ռասայական խտրականութեան բոլոր ձեւերու բացառման միջազգային կոնվենցիայի խախտումներու առնչութեամբ, Սեպտեմբերի 16-ին, հաղորդած է ՄԱԿ-ի գլխաւոր դատական մարմինը:

Հագայի դատարանի հաղորդագրութեան համաձայն՝ հայցուորը կը պնդէ, որ «տասնամեակներ շարունակ Ատրպէյճանը ռասայական խտրականութեան ենթարկած է հայերուն», եւ թէ «պետութեան կողմէ հովանաւորուող հայատեաց այս քաղաքականութեան հետեւանքով հայերը ենթարկուած են սիստեմատիկ խտրականութեան, զանգուածային սպանութիւններու, խոշտանգումներու եւ այլ նվաստացումներու: Այդ գործելակերպը հերթական անգամ առաջ մղուած է 2020 թուականի Սեպտեմբերին՝ Արցախի Հանրապետութեան եւ Հայաստանի դէմ Ատրպէյճանի ագրեսիայէն ետք»:

Պաշտօնական Երեւանն իր հայցին մէջ կ՛ընդգծէ, որ նոյնիսկ ռազմական գործողութիւններու աւարտէն եւ 2020 թուականի Նոյեմբերի 10-ին հրադադարի ուժի մէջ մտնելէ ետք Ատրպէյճանը շարունակած է հայ գերիներու, պատանդներու եւ ձերբակալուած այլ անձերու սպաննութիւնները, խոշտանգումներն ու միւս նվաստացումները: