Հասարակութեան լայն շրջանակին հայկական հարուստ մշակութային ժառանգութեանը ծանօթացնելու նպատակով Էրեբունի եւ Մեծամոր թանգարանները, համագործակցելով ՀՀ-ի մէջ Լեհաստանի եւ Ֆրանսիայի դեսպանութիւններու հետ, էքսկուրսիաներ, ցուցահանդէսներ, հնագիտական պեղումներուն նուիրուած ներածական սեմինարներ, շնորհանդէսներ եւ կոնֆերանս նախաձեռնած են:

Էրեբունի թանգարանին մէջ հայ եւ ֆրանսիացի երեխաները մասնակցեցան «Պեղենք միասին» ծրագիրին, ներկայացուցին «Էրեբունիէն Թեյշեբաինի՝ եռաչափ վերակազմութիւն» գիրքը եւ կազմակերպեցին գիտաժողով՝ «Մեծամորէն Էրեբունի» խորագիրով:

«Նախաձեռնութիւններու նպատակն է փորձել արժեւորել, կարեւորել մեր ժառանգութիւնն ու այն կատարել որակեալ կրթութեան միջոցով: Հայ եւ ֆրանսիացի երեխաները համատեղ պեղումներ կիրականացնէն,  գանձերու, կարեւոր իրերու կրկնօրինակներ»,-պատմեց Էրեբունի թանգարանի տնօրէն Միքայել Պատալեանը։

Անդրադառնալով «Էրեբունիէն Թեյշեբաինի՝ եռաչափ վերակազմութիւն» գիրքին՝  Պատալեանը տեղեկացուց, որ շատ գեղեցիկ եւ հանրամատչելի ներկայացուած են Կարմիր բլուրի եւ Էրեբունիի տարբեր կառոյցներու եռաչափ վերակազմութիւնները, որոնք կատարուած են պեղումներու արդիւնքներէն ստացուած տուեալներու, ուրարտական պատկերագրութեան, Մերձաւոր Արեւելքի հնագիտութեան, ուրարտական սեպագիր աղբիւրներու խորը քննութեան ու վերլուծութեան հիման վրայ: