Ֆրանսայի նախագահի `Սուրիոյ հողին վրայ Թիւրքիոյ ՛՛Ձիթենիի Ճիւղ՛՛ ռազմական գործողութեան դէմ նախազգուշացման արձագանքելով, Թիւրքիոյ վարչապետը յայտարարեր է, որ Մակրոնը  ամբողջական ըմբռնում չունի՝  ահաբեկչութեան դէմ իր երկրի տարած պայքարին վերաբերեալ:

«Ամբողջ աշխարհը պէտք է իմանայ, որ Թիւրքիան այս ռազմական գործողութիւնը չէ սկսած բռնագրաւման նպատակներով», – ըսեր է Թիւրքիոյ վարչապետ Բինալի Յըլդըրըմը, կը հաղորդէ Mehr News-ը:

«Եթէ պարզուի, որ այս գործողութիւնը կը հետապնդէ մէկ այլ նպատակ՝ քան թիւրքական սահմանին վրայ հնարաւոր ահաբեկչական սպառնալիքին դէմ պայքարն է, եւ որ այն ներխուժման գործողութիւն է՝ այդ պահէն սոյն գործողութիւնը մեզի համար իրապէս կը դառնայ լուրջ խնդիր», ըսաւ Ֆրանսայի նախագահ Էմմանուել Մակրոն, ով երեկ երեկոյեան ելոյթ ունեցաւ Փարիզի մէջ Ֆրանսայի հայ համայնքի ներկայացուցիչներուն հետ ընթրելէ ետք:

Ըստ Մակրոնի, Թիւրքական ռազմական գործողութիւնը Սուրիոյ հիւսիս-արեւմուտքին գտնուող Աֆրինի քրդական անկլաւին դէմ, «Կ՛ենթադրէ քննարկումներ անցընել, եւ որոշումներ կայացնել ոչ միայն եվրոպացիներու միջեւ, այլ աւելի լայնօրէն՝ դաշնակիցներու միջեւ: Քանի որ ատիկա կը փոխէ թիւրքական ներխուժման բնոյթը, եւ ատոր համար ալ յառաջիկայ օրերուն կրկին պիտի խօսիմ Էրդողանի հետ»:

Յիշեցնենք, որ թիւրքական բանակն անցեալ շաբաթ միջազգային օրէնքներու խախտում կատարելով, եւ առանց Դամասկոսի օրինական կառավարութեան թոյլտւութեան՝ «Ձիթենիի ճիւղ» ռազմական գործողութեամբ գրոհեր է Սուրիոյ հիւսիսին գտնուող Աֆրին քաղաքի տարածք, ԱՄՆ-ի աջակցութիւնը վայելող ուժերու դէմ։

Այդ միջոցին սպաննուած քաղաքացիներուն թիւը կ՛աճի: Աֆրինի տարածաշրջանին (22.01.2018 թ. դրութեամբ)11 քաղաքացի զոհուած է, 16 ուրիշներ վիրաւորուած են թիւրքական օդուժի, հրետանիի եւ Թիւրքիոյ մէջ հաւաքագրուած ահաբեկչական խումբերուն կատարած պայթիւններուն հետեւանքով:

Ըստ թղթակիցներու, սպաննուած քաղաքացիներուն թիւը 11 է, որոնցմէ 6-ը երեխայ եւ մէկը կին: 16 այլ քաղաքացիական անձեր, որոնց մէջ 4 երեխայ եւ մէկ կին վիրաւորուած են: Անոնք տակաւին կը բուժուին Աֆրինի հիւանդանոցներուն մէջ:

Պէտք է նշել, որ թիւրքական գրոհի եւ բռնագրաւման փորձերը կը շարունակուին, ինչպէս նաեւ օդային հարուածները եւ հրետանային ռմբակոծութիւնները, սակայն անոնք կը հանդիպին Սուրիոյ դեմոկրատական ուժերու (ՍԴՀ) ուժեղ դիմադրութեան: