Բրիտանական «Reuters» լրատուական գործակալութիւնը գրած է, որ Ռուսաստանն աւելցուցած է օդային հարուածներու թիւը Սուրիայի մէջ՝ ընդդիմութեան վերահսկողութեան տակ գտնուող հիւսիսարեւմտեան շրջաններուն, իսկ Թուրքիան սկսած է զօրքեր տեղափոխել այդ շրջաններ։

Գործակալութիւնը, հղում կատարելով սեփական աղբիւրներուն, յայտնած է, որ Ռուսաստանի նախագահ Վլադիմիր Բութինի եւ Թուրքիայի նախագահ Թայիփ Էրդողանի սպասուելիք հանդիպումէն երեք օր առաջ ռուսական կողմն սկսած է թիրախաւորել Աֆրինի շրջակայքի գիւղերը եւ մէջբերած է ընդդիմադիր «Սուրիայի ազատ բանակի» խօսնակ Յուսեֆ Համուդի վկայութիւնը, որ ռուսական կողմի հարուածներն Իտլիպի շրջանէն սահմանային երկայնքով  կը հասնի մինչեւ Հալեպի հիւսիս։

Միաժամանակ հաղորդուած է, որ, ըստ թուրքական բանակի հետ համատեղ գործող ստորաբաժանումներու հրամանատարներու, Թուրքիան վերջին երկու շաբաթուայ ընթացքին մեծ թիւով զօրք, զրահատեխնիկա եւ սպառազինութիւն ուղարկած է շրջան՝ ցոյց տալու հնարաւոր յարձակումներուն հակազդելու իր վճռականութիւնը։