Ինչպէս գրած է «Ազատութիւն» ռատիոկայանը՝ 44-օրեայ պատերազմէն ետք հայ-ատրպէյճանական սահմանագծման ու սահմանազատման թեմային զուգահեռ` օրակարգին մէջ յայտնուեցաւ կողմերու միջեւ անկլավներու փոխանակման հարցը: 90-ականներու պատերազմէն ետք ատրպէյճանական կողմը մնացած է երբեմնի հայաբնակ Արծվաշենը, որ ժամանակին Գեղարքունիքի մարզի կազմին մէջ էր։ Արծվաշենը, որ ատրպէյճանական զինուժի կողմէ գրաւուած է 1992-ին, Խորհրդային Հայաստանի բնակավայրերու ցուցակին կը յիշատակուի որպէս Բաշքենդ: Չնայած գիւղին մէջ դեռ պահպանուած են հայերուն պատկանող տուները, այսօր արդեն ատրպէյճանցիներով բնակեցուած Բաշքենդը չորս կողմէ ատրպէյճանական գիւղերով շրջապատուած է: «Ազատութիւն» ռատիոկայանի ատրպէյճանական ծառայութիւնը գիւղի բնակիչներէն հետաքրքրուած է, թէ ինչ կը մտածեն անկլավներու փոխանակման մասին: Ատրպէյճանցիները կողմ չեն, որ Բաշքենդը Հայաստանին վերադարձուի:  Կ՛ըսեն` եթէ Բաշքենդը կորսնցնեն, այս շրջանի տասնեակ գիւղեր առանց ապրուստի կը մնան:

Հայկական եւ ատրպէյճանական անկլավներու ճակատագիրը դեռ անյայտ է: Պարզ չէ, թէ արդեօք այդ գիւղերու փոխանակման հարցը կ՛ընդգրկուի Հայաստանի եւ Ատրպէյճանի ղեկավարներու բանակցային օրակարգին մէջ:

Leave a Reply