Ատրպէյճանի դէմ Հայաստանի հայցի շուրջ լսումները Հաագայի դատարանին մէջ մեկնարկած են երեկ։ Հայկական կողմը միջազգային այս կառոյցէն կը պահանջէ մինչեւ  դատաքննութիւնը միջոցներ ձեռնարկել, որ Ատրպէյճանն անհապաղ ազատ արձակէ գերիներուն, քաղաքացիական անձերուն, փակէ Պաքուի կենտրոննին մէջ բացուած «ռազմավարի պուրակը»։ Մարդու իրաւունքներու եւրոպական դատարանին մէջ Հայաստանի ներկայացուցիչը ատրպէյճանական կողմին մեղադրած է նաեւ էթնիկ զտումներու, ազգային ատելութիւն հրահրելու մէջ:

Ատրպէյճանը, սակայն, կը հերքէ ռասայական խտրականութեան մասին Հայաստանի մեղադրանքները։ ՄԱԿ-ի Արդարադատութեան միջազգային դատարանին մէջ երեկ մեկնարկած լսումներու ժամանակ իր պատասխան ելոյթին Ատրպէյճանի ներկայացուցիչ Էլնուր Մամետովը պնդած է՝ հայկական կողմի փաստարկները ճիշդ չեն:

ՄԱԿ-ի Արդարադատութեան միջազգային դատարանին մէջ իրար դէմ Հայաստանի եւ Ատրպէյճանի հայցերով լսումները կը շարունակուին քանի մը օր։ Ատրպէյճանի պատասխանէն ետք հայկական կողմը կ՛արձագանքէ։