Արեւմտեան Հայաստանի Հանրապետութեան Կառավարութիւնը ուղերձ յղած է

 

ՄԱԿ-ի Անվտանգութեան Խորհուրդի անդամ եւ Սեւրի Խաղաղութեան Դաշնագիրը ստորագրած երկիրներու կառավարութիւններուն

 

Հայաստանի Հանրապետութեան ներքին իրավիճակի եւ Արցախեան հարցի խաղաղ կարգաւորման խնդիրներու կապակցութեամբ, որուն մէջ մասնաւորապէս ըսուած է.  

 

«Հայաստանի Հանրապետութեան ներքին իրավիճակի կտրուկ սրման խորքային եւ հիմնական պատճառներէն մէկը Արցախեան խնդիրի կարգաւորման ինչ-որ նոր տարբերակ մը շրջանառութեան մէջ դնելու հարցն է, այդ թուին՝ տարածքներու յանձնման պայմանով եւ հայ հանրութեան համար չափազանց զգայուն այլ նմանատիպ խնդիրներու առկայութեամբ։ Ակնյայտ է, որ այդ ամէնը պիտի չնպաստէ թէ՛ իրապէս զինուած դիմակայութեան անարիւն հանգուցալուծման, եւ թէ՛ Արցախեան խնդիրի վերջնական ու արդարացի կարգաւորման:

Յետեւաբար, այս պարագային, մենք կը ցանկանք Ձեր ուշադրութիւնը հրաւիրել այն իրողութեան վրայ, որ Արցախի, Հայաստանի Հանրապետութեան, Մերձաւոր Արեւելքի, Արեւմտեան Հայաստանի հայութեան հիմնախնդիրները կրնան լուծուիլ եւ պէտք է լուծուին բացառապէս իրաւական դաշտի սահմաններուն մէջ՝ նկատի ունենալով այն բոլոր որոշումները, որոնք կայացուեր են 1920-ական թթ. հայութեան ու Հայաստանին վերաբերեալ, սակայն մինչեւ օրս չեն իրականացուեր: Ատոնց շարքին են՝ Սեւրի Խաղաղութեան Դաշնագիրի 92-րդ յօդվածի պահանջը Հայաստանի եւ Ադրբեջանի Հանրապետութեան միջեւ սահմանազատման վերաբերեալ, Սեւրի Խաղաղութեան Դաշնագիրի յօդուածները Հայաստանին վերաբերեալ, ԱՄՆ 28-րդ Նախագահ Վուդրո Ուիլսոնի կայացուցած Իրաւարար վճիռը Հայաստանի եւ Թուրքիայի միջեւ սահմանազատման վերաբերեալ:

Կը խնդրենք հաշուի առնել, որ Հայաստանի Հանրապետութեան, Արցախի, Մերձաւոր Արեւելքի, Արեւմտեան Հայաստանի հայութիւնը, ինչպէս նաեւ համայն հայութիւնը, իրաւունք ունի արժանապատիւ կեանքի, զարգացման հեռանկարի, եւ ապագայի յոյսի:

Կը խնդրենք նկատի առնել, որ նոր ժամանակաշրջանին՝ 1988-էն ի վեր, Արցախի, Հայաստանի Հանրապետութեան, Մերձաւոր Արեւելքի հայութիւնը դարձեր է թշնամական ծրագիրներու եւ գործողութիւններու թիրախ, այդ շարքին՝ նախայարձակման, յարձակումներու, բռնագաղթի, շրջափակման: Աւելին, տարածաշրջանին մէջ յարձակումներու եւ ոչնչացման թիրախ դարձեր են ոչ միայն հայ մարդիկ ու քաղաքացիներ, թաղամասեր ու բնակավայրեր, գիւղեր ու քաղաքներ՝ այլեւ Հայոց քաղաքակրթական արժեքներ, եկեղեցիներ, դպրոցներ, պատմամշակութային ու կրթական նշանակութիւն ունեցող շինութիւններ ու կառոյցներ:

Այո, հայութիւնը եւ Հայաստանը շատ տառապեր են, բայց այդ չի նշանակեր, թէ այդպէս կրնայ անվերջօրէն շարունակուիլ: Արդէն շատոնց ժամանակը հասունցած է տարածաշրջանին մէջ իրավիճակն արմատապէս փոխելու յանուն խաղաղ գոյակցութեան ու բնականոն զարգացման:

Ձեզի ուղղուած այս ուղերձի իմաստն այդ ամենուն մէջ Ձեր դրական, կառուցողական եւ գործուն մասնակցութեան հարցը դիտարկելն է, ու զայն իրականացնելը»:

 

Արեւմտեան Հայաստանի Հանրապետութեան Կառավարութեան Լրատուական ծառայութիւն  

 

25.07.2016 թ.