Հայաստանի ու Ատրպէյճանի միջեւ սահմաններու դեմարկացիայի ու դելիմիտացիայի գործընթաց չէ սկսած, այդ տպաւորութիւնը սխալ է։ Այս մասին Յոկտեմբերի 19-ին լրագրողներուն ըսած է ՀՀ փոխվարչապետ Մհեր Գրիգորեանը։ Ըստ անոր՝ նախ պէտք է ուսումնասիրել սահմաններու հետ կապուած բոլոր իրաւական հիմքերը և փաստաթուղթերը։

«Որպէսզի մենք խօսինք սահմաններու մասին, նախ մենք պէտք է լիարժէք հետազոտենք սահմաններու հետ կապուած իրաւական ամբողջ բազան։ Եւ ընդ որուն, իրաւական այն բազան, որտեղ երկու երկիրներու համաձայնութիւն կայ, ստորագրութիւնը։ Անկէ ետք հնարաւոր կ՛ըլլայ խօսիլ քարտէսներու մասին, որովհետեւ քարտէսն ինքնուրոյն համակարգ է, քարտէսի տակ պէտք է  ըլլայ իրաւական հիմք։ Եւ այդ իրաւական հիմքերու վրայ մենք կ՛աշխատինք, կը հետազոտենք, կը հաւաքագրենք, եւ վերլուծելէ ետք հնարաւոր կ՛ըլլայ խօսիլ քարտէսներու մասին»,- ըսած է Մհեր Գրիգորեանը։