ՀՀ նախագահ Արմեն Սարգսեան աշխատանքային այցով մեկնած է Սէուտական Արաբիա: Նախագահի աշխաակազմէն կը տեղեկցնեն, որ 26 Հոկտեմբեր 2021-ը առանձնայատուկ էջ պիտի դառնայ հայ-արաբական եւ մասնաւորապէս Հայաստանի Հանրապետութիւն-Սէուտակաան Արաբիա յարաբերութիւններու պատմութեան մէջ: Այս աննախադէպ իրադարձութիւնը միանշանակ շրջադարձային է Հայաստանի միջազգային յարաբերութիւններուն մէջ։

Հայաստանի անկախութենէն ի վեր ՀՀ եւ Սէուտական Արաբիոյ միջեւ դիւանագիտական յարաբերութիւններու բացակայութեան պայմաններու մէջ, երբ Հայաստանէն որեւէ պաշտօնեայ երբեւիցէ չէր այցելած այդ երկիր, Հայաստանի նախագահը կատարեց պատմական քայլ՝ առաջին անգամ այցելելով արաբական եւ իսլամական աշխարհին մէջ բացառիկ դեր եւ նշանակութիւն ունեցող այդ պետութիւն:

Հայաստանի նախագահը եւ Սէուտական Արաբիայի թագաժառանգը զրուցած են երկու երկիրներու միջեւ յարաբերութիւնները զարգացնելու անհրաժեշտութեան եւ անոնց ապագայի շուրջ։ Նշուած է, որ երկու ժողովուրդներու միջեւ պատմական հարուստ առնչութիւնները լաւ հիմք են ապագային միտուած միջպետական յարաբերութիւններ կառուցելու համար: