Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնի մէջ ընդունեց Հայաստանի մէջ գտնուող Սուրբ Աթոռի պետքարտուղարի ընդհանուր հարցերով փոխանորդ արքեպիսկոպոս Էդգար Պենիա Պառային եւ անոր պատուիրակութեանը:

Ողջունելով Քոյր Եկեղեցիի ներկայացուցիչներու այցը հայոց հոգեւոր կենտրոն՝ Նորին Սրբութիւնը յոյս յայտնեց, որ Սուրբ Աթոռի դիւանագիտական մշտական ներկայացուցչութեան բացումը Երեւանի մէջ Վատիկանի եւ Մայր Աթոռի միջեւ համագործակցութեան նոր հնարաւորութիւններ կ՛ընձեռնէ։ Հանդիպմանն Ամենայն Հայոց Կաթողիկոսը երախտագիտութիւն յայտնեց Սուրբ Աթոռին եւ անոր գահակալին արցախեան 44-օրեայ պատերազմի ու յետպատերազմեայ ծանր օրերուն Հայաստանին եւ հայ ժողովուրդին բերած աջակցութեան, զօրակցութեան, ինչպէս նաեւ ռազմագերիներու վերադարձնելու գործին ներդրած ջանքերու համար: 

Արքեպիսկոպոս Էդգար Պենիա Պառան, շնորհակալութիւն յայտնելով ջերմ ընդունելութեան համար, Նորին Սրբութեանը փոխանցեց Հռոմի Սրբազան Քահանայապէտ Ֆրանցիսկոս Պապի բարեմաղթութիւնները։ 

Վատիկանի փոխպետքարտուղարը հաւաստիացուց, որ Սուրբ Աթոռը կը շարունակէ ամեն ջանք գործադրել յետպատերազմեայ խնդիրներու, ի մասնաւորի Ատրպէյճանի վերահսկողութեան տակ անցած տարածքներուն հայկական հոգեւոր-մշակութային ժառանգութեան պահպանութեան եւ հայ ռազմագերիներու վերադարձնելու հարցը հանգուցալուծելու համար։