Գերմանաբնակ Անի Թունեանը, Խաչատուր Պարտեզպանեանը եւ «Միասին» նախաձեռնութիւնը արձագանքած են Արցախի Մարդու իրաւունքներու պաշտպանի գրառմանը, ըստ որու՝ Հադրութի «Դիզակ» մանկապարտեզը ունի խաղալիքներու, սպիտակեղենի եւ այլ պարագաներու կարիք, եւ նոր խաղալիքներ ու գրենական պիտոյքներ ուղարկել Արցախ: 

Ստեփանակերտի մէջ վերաբացուած Հադրութի շրջանի «Դիզակ» մանկապարտեզն այսօր ստացաւ այդ օգնութիւնը՝ «Առաքելութիւն Հայաստան» ՀԿ Արցախի մասնաճիւղի միջոցով:

Մանկապարտեզի տնօրէն Ռիթա Սարդարեանն իր խորին շնորհակալութիւնը յայտնեց բարերարներուն եւ պարզապէս բարի մարդկանց, ովքեր կ՛աջակցին, յոյս կը ներշնչեն՝ կանգնելով Արցախի կողքին:

«Մենք կը կարողանանք վստահ քայլերով առաջ շարժուիլ, շարունակել մեր պայքարը եւ մեր անմեղ մանուկներու համար ստեղծել այնպիսի մոլորակ, որտեղ անոնք իրենց երջանիկ ու ապահով կը զգան», – նշեց Ռ. Սարդարեանը: