Թուրքիան աւելի քան 30 հազար զինուոր տեղադրած է սուրիական սահմանի մոտ, բանակը կազմ ու պատրաստ կ՛սպասէ յարձակման հրամանին՝ Սուրիայի տարածքին քուրտ զինեալներու հետ կապուած հարցը վերջնականապէս կարգաւորելու համար, յայտնած են թուրքական աղբիւրները։

Ռուսական РИА “Новости”-ն Հոկտեմբերի 2-ին, վկայակոչելով իր աղբիւրները, գրած էր, թէ թուրքական բանակը՝ իրեն հաւատարիմ սուրիական կազմաւորումներու հետ միասին, կարող է արդեն ռազմական գործողութիւն սկսիլ արաբա-քրտական ստորաբաժանումներու դէմ:

Թուրքական հնարաւոր յարձակումը Սուրիայի մէջ կը հակասէ թէ՛ Ուաշինգտոնի, թէ՛ Մոսկուայի շահերուն, սակայն պաշտօնական Մոսկուան շատ զգուշ է Թուրքիայի հետ յարաբերութիւններուն եւ կտրուկ յայտարարութիւններ չի կատարեր։ Ռուսական պետական լրատուական գործակալութիւնն, այնուհետեւ, կը հաղորդէ, որ Թուրքիան Սուրիայի մէջ երկու ռազմական գործողութիւն կը պատրաստէ․ մէկը՝ հիւսիս-արեւմուտքի գտնուող Իտլիպի մէջ, երկրորդը՝ հիւսիս-արեւելքին գտնուող Հասակէ նահանգին մէջ: