Մարդու իրաւունքներու եւրոպական դատարանը հրապարակած է 2014 թուականին Ատրպէյճանի մէջ գերի վերցուած եւ խոշտանգուած՝ Տաւուշի մարզի Վերին Կարմիր աղբիւր գիւղի բնակիչ Մամիկոն Խոջոյեանի եւ Չինարի գիւղի բնակիչ Կարեն Պետրոսեանի գործերով վճիռները:  Եւրադատարանը ընդունած է, որ Պաքուն խախտած է հայ գերիներու կեանքի իրաւունքը, խոշտանգումներէն, խտրականութենէն զերծ մնալու, ազատութեան, անձնական անձեռնմխելիութեան իրաւունքները: ՄԻԵԴ-ը պարտադրած է Ատրպէյճանին իւրաքանչիւր գործով վճարել 40 հազար եւրո:

77-ամեայ Մամիկոն Խոջոյեանը գերեվարուած էր 2014-ի Յունուարին, երկու ամիս ետք՝ Մարտի 4-ին, ան Հայաստան վերադարձած էր եւ որոշ ժամանակ ետք՝ մահացած: Դատաբժշկական փորձաքննութիւնը ցոյց տուաւ, որ Խոջոյեանի մահուան պատճառն եղած է օրգանիզմի ընդհանուր թունաւորում: Կարեն Պետրոսեանը 2014 թուականի Օգոստոսի 7-ին յայտնուած էր ատրպէյճանական գիւղին մէջ: Կարճ ժամանակ ետք Ատրպէյճանի իշխանութիւնը անոր ձերբակալած էր եւ յաջորդ օրը յայտարարած, որ ան մահացած է սրտի կաթուածի պատճառով: