Ամերիկեան ուժերը Նոյեմբերի 7-ին Հասաքէի գիւղական շրջանի Խարապ Ժիր օդակայանին մէջ գտնուող իրենց ռազմակայանէն հեռացուցած են 270 մեքենաներէ բաղկացած շարասիւն մը, որ Ուալիտի սահմանային անցքին ճամբով ուղղուած է հիւսիսային Իրաք:

«Մայատին» արբանեակային պատկերասփիւռի կայանը կը նշէ, որ ասիկա վերջին տարիներուն ամերիկեան զինուորական մեքենաներու Սուրիայէն հեռացման մեծագոյն գործողութիւններէն մէկն է:

Տեղական աղբիւրներ կը նշեն, որ շարասիւնին մաս կը կազմէին 150 բեռնակառքեր եւ հրասայլեր փոխադրող 120 մեքենաներ: Սուրիոյ ժողովրդավարական ուժերուն պատկանող ինքնաշարժներ ապահոված են շարասիւնին անվտանգութիւնը:

25 հոկտեմբերին սուրիական քարիւղ փոխադրող բեռնակառքեր իրենց կարգին Սուրիայէն մեկնած էին հիւսիսային Իրաք, իսկ ատկէ ժամեր առաջ 79 զինուորական մեքենաներ, որոնց մեծամասնութիւնը` զրահապատ մեքենաներ, Խարապ Ժիրի օդակայանէն Ուալիտ սահմանային անցքին ճամբով մեկնած էին դէպի իրաքեան տարածք: