Ատրպէյճանցիներն  աւիրած են Արցախի Մադաթաշեն գիւղի դպրոցը, մշակոյթի տունը, յուշարձանն ու վնասած են Սբ․ Աստուածածին եկեղեցին։

Արցախի մշակութային ժառանգութեան մշտադիտարկում իրականացնող monumentwatch.org կայքը գրած է.

«Ըստ  2021 թուականի Հոկտեմբերի 10-ի  արբանեակային լուսանկարներու՝ թշնամին քանդած է Ասկերանի շրջանի Մադաթաշեն գիւղի դպրոցը  եւ հասած է դպրոցին կից եկեղեցիի պատին, որը,  վտանգի տակ է։  Դպրոցը 2015 թուականէն վերանուանուած էր «Մադաթաշեն», որու  շենքին մէջ   տեղակայուած են նաեւ  գիւղի գիւղապետարանն ու մշակոյթի տունը։ Եկեղեցւոյ կողքին կար Արցախեան ազատամարտի զոհերուն նուիրուած յուշարձան, որը թշնամին նոյնպէս ոչնչացուցած է։ Ատրպէյճանական կողմի տարածած տեսանիւթին մէջ ակնյայտ հստակ է, թէ ինչպէս  զինուած  ատրպէյճանցի զինուորականը կը  քանդէ եւ կ՛աւիրէ։ 

Մադաթաշեն գիւղի պատմութիւնը սկսած է 17-րդ դարի կէսին, իսկ անունը ստացած է ռուսական բանակի գեներալ Վալերիան Մադաթովի անունով։ Կը գտնուի մայրաքաղաք Ստեփանակերտէն 24 կմ հեռաւորութեան վրայ։ Գիւղի  Սբ. Աստուածածին եկեղեցին  կառուցուած է 1904 թուականին։ Եկեղեցւոյ պատը վնասուած էր, տանիքը՝ նոյնպէս։