Ինչպէս յայտնած է Լրագիր լրատուական կայքը՝ Արցախցի  խումբ մը կանայք հանդիպած են ՌԴ խաղաղապահ զօրքերու հրամանատար, գեներալ-լեյտենանտ Գենադի Անաշկինի հետ՝ արտայայտելու իրենց մտահոգութիւնը վերջին շրջանին Ատրպէյճանի կողմէ իրականացուած եւ անպատիժ մնացած սանձարձակութիւններուն, ոճրագործութիւններուն վերաբերեալ։  Անոնք բարձրաձայնած են գործող անվտանգութեան մեխանիզմները վերանայելու անհրաժեշտութիւնը։ Դիմումին մէջ թուարկուած են խաղաղապահներու օրոք Պաքուի յանցագործութիւնները, անոնց հետեւանքով մարդկային զոհերու հանգամանքը։ Վերջինը Նոյեմբերի 9-ին արիւնոտ դէպքն էր։

Ինչպէս նշած է կայքը՝ Արցախի մէջ ռուսական զօրքի ներկայութեան նիւթին իրենք աւելի վաղ անդրադարձած են։ Ըստ կայքի՝ խաղաղապահները ոչ թէ շնորհ կ՛ընեն արցախցիներուն, այլ Արցախի մէջ են հակահայ ռուս-թուրքական գործարքով։ Անվտանգութիւնը խաղաղապահները չեն, այլ՝ քաղաքական երաշխիքները՝ կարգավիճակի եւ միջազգային ճանաչման տեսքով։  Արցախը պարտական չէ Ռուսաստանին, ընդհակառակը՝ Ռուսաստանը շատ թանկ պիտի վճարէ այն ամենի համար, ինչ Արցախի դէմ կը կատարէ 1813-էն ի վեր։