ՀՀ Մարդու իրաւունքներու պաշտպան Արման Թաթոյեանը ԱՄՆ կոնգրեսական Ատամ Շիֆի հետ զրոյցի ընթացքին ներկայացուցած է Հայաստանի գիւղերու մերձակայքին ատրպէյճանական զինուժի զինուած յարձակումներու, մարդու իրաւունքներու ոտնահարմամբ ճանապարհներու արգելափակման փաստերը: Քննարկումը կազմակերպած է Արեւմտեան Ամերիկայի տարածաշրջանին մէջ Հայաստանի ազգային կոմիտեն, կ՛ըսուի մարդու իրաւունքներու պաշտպանի գրասենեակի յայտարարութեան մէջ:

Արման Թաթոյեանը կոնգրեսականին յայտնած է, որ ատրպէյճանական զօրքերն ապօրինի կը տեղակայուին հայկական քաղաքներու եւ գիւղերու միջեւ ճանապարհներուն, որը վտանգ կ՛առաջացնէ մարդկանց կեանքին ու առողջութեան, կը խախտէ բնակիչներու բնականոն կեանքը:

Մարդու  իրաւունքներու պաշտպանը նաեւ անդրադարձած է Ատրպէյճանի մէջ ապօրինի պահուած հայ ռազմագերիներուն անհապաղ վերադարձնելու եւ Պաքուի մէջ անոնց կեղծ դատավարութեանը: Ան ընդգծեր է այդ հարցի միջազգային պատասխանի կարեւորութիւնը։ Կը Հաղորդէ “ԱՐՄԵՆՓՐԵՍ” -ը: