Արցախի կարգավիճակի հարցն առաջնային է, այն պատերազմով չի կարելի փակուած համարել եւ առանց կարգաւորման անհնար է խօսիլ ամուր կայունութեան մասին: Այս մասին «Ամերիկայի Ձայն»-ին տուած հարցազրոյցի ժամանակ յայտարարած է ԵԱՀԿ Մինսքի խումբի ԱՄՆ-ի նախկին համանախագահ, պաշտօնաթող դեսպան Ջեյմս Ուորլիքը:

«Կը կարծեմ Մինսքի խումբի համանախագահողները կը շարունակեն այս հարցի կարգաւորման ուղղութեամբ կարեւոր դեր խաղալ: Գիտեմ, որ Ռուսաստանն իր ձեռքը վերցուցած է բազմաթիւ հարցեր, սակայն, կը հաւատամ, որ համանախագահողները, ԵԱՀԿ-ն եւ Միացեալ Նահանգները պէտք է աշխուժ ըլլան եւ առաջ մղեն այս համընդհանուր խնդիրի կարգաւորումը ընդմիշտ: Միայն այս պարագային մենք տարածաշրջանին մէջ կայունութեան կը հասնինք»,- ըսած է նախկին համանախագահը:

Ամերիկացի նախկին դիւանագետի հետ համաձայն է նաեւ Հայաստանի մէջ աշխատող ԱՄՆ-ի վերլուծաբան Տանիել Շապիրոն: Անոր կարծիքով, 44-օրեայ պատերազմէն ետք Արեւմուտքը դուրս մնացած է Հարաւային Կովկասի մէջ տեղի ունեցած գործընթացներէն, որու վերջնական արտացոլումը դարձաւ 3+2 ձեւաչափը, որը Հայաստանին միայնակ կը ձգէ  իր շահերը չկիսող Թուրքիայի, Ատրպէյճանի, Ռուսաստանի եւ Իրանի հետ: