Արեւմտեան Հայաստանի Տիգրանակերտ նահանգի Չինար գաւառին մէջ Հռոմէական կայսրութեան ժամանակ որպէս «ռազմական բնակավայր» օգտագործուած 3000-ամեայ Զերզեւանի ամրոցին պեղումներու ժամանակ յայտնաբերուած է 1600 տարուայ սրինգ եւ պրոնզէ մատանի։  2014 թուականէն սկսած պեղումները կը շարունակուին մինչեւ այսօր։

Ամրոցին մէջ, որը ԵՈՒՆԵՍԿՕ-ի Համաշխարհային ժառանգութեան ժամանակաւոր ցանկին մէջ է, տարբեր ժամանակահատուածներ յայտնաբերուած են բազմաթիւ կենցաղային արտեֆակտներ, հացահատիկի եւ զէնքի պահեստներ, ժայռափոր դամբարաններ, ջրատար ուղիներ, ինչպէս նաեւ հռոմէական ժամանակաշրջանի Միթրայի ստորգետնեայ տաճարը, եկեղեցի, վարչական կառոյց, ապաստարաններ եւ վերջապէս, 1600 տարեկան սրինգ, որը պատրաստուած է մանր եղջերաւոր կենդանիի ոտքի ոսկորէ եւ պրոնզէ  մատանի՝ բանալիով։ 

Այս վերջին երկուքը պեղումներու ժամանակ հազուադէպ հանդիպող առարկաներ են  եւ  տարածաշրջանի մէջ առաջին անգամ ի յայտ եկած են: